វ៉ាស៊ីនតោន ៖ ផ្កាយរណបអង្កេតផែនដី របស់ NASA បានជួយអ្នកស្រាវជ្រាវ តាមដានការបំភាយកាបូន ឌីអុកស៊ីត សម្រាប់ប្រទេសជាង ១០០ ជុំវិញពិភពលោក នេះបើយោងតាមការសិក្សា អន្តរជាតិ ដែលបានចេញផ្សាយ កាលពីថ្ងៃអង្គារ ។
ការសិក្សាដែលធ្វើឡើង ដោយអ្នកស្រាវជ្រាវជាង ៦០នាក់ បានប្រើការវាស់វែងដែលធ្វើឡើង ដោយបេសកកម្ម Orbiting Carbon Observatory-2 របស់អង្គការណាសា ក៏ដូចជាបណ្តាញ នៃការសង្កេតលើផ្ទៃ ដើម្បីកំណត់បរិមាណការកើនឡើង និងការថយចុះនៃកំហាប់កាបូនឌីអុកស៊ីត បរិយាកាសពីឆ្នាំ ២០១៥ ដល់ឆ្នាំ២០២០ ។
ការសិក្សានេះផ្តល់នូវទស្សន វិស័យថ្មីមួយដោយតាមដាន ទាំងការបំភាយឥន្ធនៈហ្វូស៊ីល និងការផ្លាស់ប្តូរ “ស្តុក” កាបូនសរុបនៅក្នុងប្រព័ន្ធអេកូឡូស៊ី រួមទាំងដើមឈើ និងដី។ ទិន្នន័យនេះមានប្រយោជន៍ជាពិសេស សម្រាប់ការតាមដានការប្រែប្រួល នៃកាបូនឌីអុកស៊ីត ដែលទាក់ទងនឹងការផ្លាស់ប្តូរគម្របដី នេះបើយោងតាមអង្គការណាសា ។
ការរកឃើញនេះបង្ហាញពីរបៀប ដែលឧបករណ៍ ដែលមានមូលដ្ឋាន លើលំហអាកាស អាចគាំទ្រការយល់ដឹងនៅលើផែនដី នៅពេលដែលប្រទេសនានាធ្វើការ ដើម្បីសម្រេចបាននូវគោលដៅ អាកាសធាតុ ។
លោក Karen St. Germain នាយកផ្នែកវិទ្យាសាស្ត្រផែនដីរបស់អង្គការណាសា នៅទីស្នាក់ការកណ្តាល របស់អង្គការណាសា ក្នុងទីក្រុងវ៉ាស៊ីនតោន បានឲ្យដឹងថា “អង្គការណាសា ផ្តោតលើការផ្តល់ទិន្នន័យវិទ្យាសាស្ត្រផែនដី ដែលដោះស្រាយបញ្ហាប្រឈមអាកាស ធាតុពិភពលោកជាក់ស្តែង ដូចជាការជួយរដ្ឋាភិបាលជុំវិញ ពិភពលោកក្នុងការវាស់វែង ពីផលប៉ះពាល់នៃកិច្ចខិតខំប្រឹងប្រែង កាត់បន្ថយកាបូនរបស់ពួកគេ”៕
