U.N. ៖ មហាសន្និបាតអង្គការ សហប្រជាជាតិ បានអនុម័តដោយឯកច្ឆន្ទ កាលពីថ្ងៃព្រហស្បតិ៍ នូវដំណោះស្រាយលើកដំបូងរបស់ខ្លួន ដែលនិយាយអំពីសក្តានុពល នៃបញ្ញាសិប្បនិមិត្ត “AI” ដើម្បីពន្លឿនវឌ្ឍនភាពឆ្ពោះទៅ រកការអភិវឌ្ឍន៍ប្រកបដោយនិរន្តរភាព ខណៈសង្កត់ធ្ងន់លើតម្រូវការ សម្រាប់ប្រព័ន្ធ AI ដែលមានសុវត្ថិភាព និងគួរឲ្យទុកចិត្ត ។
គំនិតផ្តួចផ្តើម ដែលដឹកនាំដោយសហរដ្ឋអាមេរិក ស្វែងរកការគ្រប់គ្រងហានិភ័យរបស់ AI ខណៈពេលដែលប្រើប្រាស់អត្ថប្រយោជន៍របស់វា។ ឯកអគ្គរដ្ឋទូតសហរដ្ឋអាមេរិក Linda Thomas-Greenfield បាននិយាយថា ថ្ងៃនេះ នៅពេលអង្គការសហប្រជាជាតិ និង AI ប្រសព្វគ្នាជាចុងក្រោយ យើងមានឱកាស និង ការទទួលខុសត្រូវក្នុងការជ្រើសរើស ជាសហគមន៍សកលដែលរួបរួមមួយ ដើម្បីគ្រប់គ្រងបច្ចេកវិទ្យានេះ ជាជាងធ្វើឲ្យវាគ្រប់គ្រង ពួកយើង ។ ដូច្នេះសូមឲ្យយើងបញ្ជាក់ឡើងវិញថា AI នឹងត្រូវបានបង្កើត និងប្រើប្រាស់តាមរយៈកញ្ចក់នៃមនុស្សជាតិ និងសេចក្តីថ្លៃថ្នូរ សុវត្ថិភាព និងសន្តិសុខ សិទ្ធិមនុស្ស និងសេរីភាពជាមូលដ្ឋាន” ។
រដ្ឋបាលលោក Biden បាននិយាយថា វាត្រូវចំណាយពេលជាង ៣ ខែ ដើម្បីចរចាអំពីអ្វីដែលខ្លួនបានកំណត់ថា ជាសំណុំនៃគោលការណ៍ជាមូលដ្ឋានជុំវិញ AI ដោយចូលរួមជាមួយប្រទេសចំនួន១២០ និងរួមបញ្ចូល នូវមតិកែលម្អពីពួកគេជាច្រើន រួមទាំងប្រទេសចិន ជាសហអ្នកឧបត្ថម្ភមួយក្នុងចំណោម សហឧបត្ថម្ភចំនួន ១២៣ ទំព័រ។
សេចក្តីសម្រេចរបស់មហាសន្និបាត មិនមានកាតព្វកិច្ចស្របច្បាប់នោះទេ វាឆ្លុះបញ្ចាំងពីការយល់ស្របផ្នែកនយោបាយរបស់សហគមន៍អន្តរជាតិ។ ដំណោះស្រាយទទួលស្គាល់ ភាពខុសគ្នានៃការអភិវឌ្ឍន៍បច្ចេកវិទ្យា រវាងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ ហើយសង្កត់ធ្ងន់លើតម្រូវការក្នុង ការភ្ជាប់ទំនាក់ទំនងឌីជីថល ដូច្នេះមនុស្សគ្រប់គ្នាអាចទទួល បានអត្ថប្រយោជន៍នៃ AI ដោយស្មើភាពគ្នា ។
វាក៏គូសបញ្ជាក់អំពីវិធានការ សម្រាប់អភិបាលកិច្ច AI មានទំនួលខុសត្រូវ រួមទាំងការអភិវឌ្ឍន៍ក្របខណ្ឌច្បាប់ គំនិតផ្តួចផ្តើមការកសាងសមត្ថភាព និងការគាំទ្រ សម្រាប់ការស្រាវជ្រាវ និងការច្នៃប្រឌិត ។ ដំណោះស្រាយលើកទឹកចិត្ត ដល់កិច្ចសហការអន្តរជាតិ ដើម្បីដោះស្រាយបញ្ហាប្រឈម ដែលកំពុងវិវត្ត និងឱកាសដែលបច្ចេកវិទ្យា AI បង្កឡើង ដោយផ្តោតលើការជំរុញគោលដៅ អភិវឌ្ឍន៍ប្រកបដោយចីរភាព ៕
ដោយ៖លី ភីលីព
