អាហ្វហ្គានីស្ថាន បានក្លាយជាប្រទេសដែលហែកហួរដោយសង្គ្រាម និងសម្បូរក្រុមសាសនាជ្រុលនិយម តែមែនទែនទៅប្រទេសនេះធ្លាប់ជាទីឋានស្ងប់សុខរបស់ពុទ្ធសាសនិក ដែលពុទ្ធសាសនា ត្រូវបាននាំមកកាន់ប្រទេស អាហ្វហ្គានីស្ថាន ក្នុងសតវត្សរ៍ទី ១ ដោយចក្រភពគូសាន។
ដំណើរធម្មយាត្រាពីគ្រប់ទិសទី នៃតំបន់អាស៊ីកណ្ដាល និងខាងត្បូង មកកាន់តំបន់ភ្នំដ៏ដាច់ស្រយាលនេះ បានកសាងអារាម និងចម្លាក់ពុទ្ធបដិមាដ៏ធំសម្បើមជាច្រើន ល្អាងជីកក្នុងភ្នំថ្មកំបោរ និងទីឋានសមាធិច្រើនសន្ធឹកទៀត ។
យ៉ាងណាគ្រាដែលសាសនាអ៊ិស្លាមជ្រៀប ចូលដល់តំបន់អាស៊ីកណ្ដាល ប្រមុខដឹកនាំសាសនាថ្មីបានបញ្ជាឲ្យកម្ទេចតំបន់ប្រវត្ដិសាស្ដ្រពុទ្ធសាសនាទាំងអស់។ សង្គ្រាមរ៉ាំរ៉ៃរាប់ទសវត្សរ៍បានបំផ្លិចបំផ្លាញតំបន់បុរាណវត្ថុវិទ្យាសំខាន់ជាច្រើន សកម្មភាពបំផ្លិចបំផ្លាញចុងក្រោយទើបបានកើតឡើងមិនយូរប៉ុន្មាន ពេលព្រះពុទ្ធបដិមាដ៏ធំសម្បើមចំនួនពីរនៅក្បែរក្រុងបាមីយ៉ាន ត្រូវបានកម្ទេចដោយក្រុមតាលីបង់ ក្នុងឆ្នាំ ២០០១។
ព្រះពុទ្ធបដិមាទាំងពីរអង្គមានកម្ពស់ ៣៦,៥ ម៉ែត្រ និង ៥៣ ម៉ែត្រ ព្រមទាំងរចនាដោយពណ៌មាស និងដាំត្បូងភ្លឺចញ្ចាចថែមទៀត។ ប្រវត្ដិវិទូជឿថា ចម្លាក់ព្រះពុទ្ធបដិមាធំៗទាំងនោះ ត្រូវបានឆ្លាក់តាមជញ្ជាំងភ្នំចន្លោះសតវត្សរ៍ទី៣ និងទី៦។
ក្រុងបាមីយ៉ាន ជាគោលដៅទេសចរណ៍សំខាន់មួយ របស់អាហ្វហ្គានីស្ថាន ភាគច្រើនដោយសារព្រះពុទ្ធបដិមាយក្ស ដែលត្រូវបានកម្ទេចនោះ។ វាក៏ជាទីឋានដ៏ស្រស់ត្រកាលមួយក្នុងប្រទេសថែមទៀត។ វាស្ថិតនៅលើរយៈកម្ពស់ប្រមាណ ២៥០០ ម៉ែត្រ និងជាតំបន់ត្រជាក់ជាង នៅក្រុងកាប៊ុល។
ស្ថានការណ៍ដ៏អាក្រក់នៅអាហ្វហ្គានីស្ថាននៅពេលនេះ គឺក្រុមតាលីបង់ បានចូលដល់ ទីក្រុងកាប៊ុល ដោយមិនមានការប្រយុទ្ធណា មួយកើតឡើងឡើយ ហើយបានបង្កើតការគ្រប់គ្រងការិយាល័យរដ្ឋាភិបាល ដែលនៅទំនេរដោយកងកម្លាំង អាហ្វហ្គានីស្ថាន។
លោក Mohammad Ashraf Ghani ប្រធានាធិបតីអាហ្វហ្គានីស្ថាន បានចាកចេញពីប្រទេសនេះ កាលពីយប់ថ្ងៃអាទិត្យ ពេលដែលកងកម្លាំង របស់ក្រុមសកម្មប្រយុទ្ធតាលីបង់ បានចូលដល់រដ្ឋធានីកាប៊ុល និងបានកាន់កាប់វិមានប្រធានាធិបតី ៕
