តូក្យូ៖ ទីភ្នាក់ងារស្រាវជ្រាវឥណទាន បាននិយាយថា ចំនួននៃការក្ស័យធនក្រុមហ៊ុន នៅក្នុងប្រទេសជប៉ុនបានកើនឡើង ក្នុងឆ្នាំ ២០១៩ ជាលើកដំបូងនៅក្នុងរយៈពេល ១១ ឆ្នាំ ដែលរងផលប៉ះពាល់ ដោយការដំឡើងពន្ធ លើការប្រើប្រាស់ ការខ្វះខាតកម្លាំងពលកម្ម និងគ្រោះមហន្តរាយធម្មជាតិ ជាបន្តបន្ទាប់យោងតាមការចេញផ្សាយ ពីគេហទំព័រជប៉ុនធូដេ ។
ការបរាជ័យក្នុងអាជីវកម្ម មានបំណុលយ៉ាងហោចណាស់ ១០ លានយ៉េនបានកើនឡើង ១,៨ ភាគរយពីឆ្នាំមុនដល់៨៣៨៣ គឺជាការកើនឡើងលើកដំបូង ចាប់តាំងពីមានវិបត្តិហិរញ្ញវត្ថុពិភពលោក ឆ្នាំ ២០០៨ ចំពោះប្រហែល ៩០ ភាគរយនៃក្រុមហ៊ុនក្ស័យធន គឺជាក្រុមហ៊ុនខ្នាតតូច ដែលមានបុគ្គលិកតិចជាង ១០ នាក់ ។ ទោះយ៉ាងណាបំណុលសរុប ដែលនៅសេសសល់ដោយក្រុមហ៊ុនក្ស័យធន បានធ្លាក់ចុះ ៤,២ ភាគរយពីមួយឆ្នាំមុនដល់ ១,៤២ ពាន់ពាន់លានយ៉េនជាកម្រិតទាបបំផុត ក្នុងរយៈពេល ៣០ ឆ្នាំដោយសារភាគច្រើននៃការក្ស័យធន ពាក់ព័ន្ធនឹងបំណុលតិចជាង ១០០ លានយ៉េន ។
ក្នុងចំណោមវិស័យទាំង ១០ នៃវិស័យកសិកម្មរុក្ខាប្រមាញ់ នេសាទ និងរ៉ែបានកើនឡើង យ៉ាងខ្លាំង ៣៤,៣៧ ភាគរយដល់ ៨៦ ករណីក្ស័យធន បន្ទាប់មកការលក់រាយកើនឡើង ៨,៦៥ ភាគរយដល់ ១.២៣០ និងការដឹកជញ្ជូនកើនឡើង ៦,៧២ ភាគរយនៅ ២៥៤ ។ ការដំឡើងពន្ធលើការប្រើប្រាស់កាលពីថ្ងៃទី១ ខែតុលា ដល់ ១០ ភាគរយពី ៨ ភាគរយបានបន្ថយការចំណាយរបស់អ្នកប្រើប្រាស់ ដោយការលក់រាយក្នុងខែតុលាបានធ្លាក់ចុះ ៧,១ ភាគរយ ជាការធ្លាក់ចុះខ្លាំងបំផុតក្នុងរយៈពេល ៤ ឆ្នាំ ។
កង្វះកម្លាំងពលកម្មចំពេលប្រជាជនមានពណ៌ប្រផេះ របស់ប្រទេសជប៉ុនបណ្តាលឲ្យមានការបរាជ័យ របស់ក្រុមហ៊ុនចំនួន ៤២៦ គឺជាចំនួនខ្ពស់បំផុត ចាប់តាំងពីទីភ្នាក់ងារស្រាវជ្រាវឥណទាន បានចាប់ផ្តើមចងក្រងទិន្នន័យពាក់ព័ន្ធក្នុងឆ្នាំ ២០១៣ និងកើនឡើងពីចំនួន ៣៨៧ ក្នុងឆ្នាំ ២០១៨៕ ដោយ៖លី ភីលីព
