ភ្នំពេញ៖ អ្នកជំនាញអចលនទ្រព្យអន្តរជាតិបានអះអាងថា តំបន់ចំនួន៤ កំពុងបង្ហាញសក្តានុពលខ្លាំង សម្រាប់ការវិនិយោគលើវិស័យអចលនទ្រព្យ និងទាក់ទាញគម្រោងអភិវឌ្ឍន៍អចលនទ្រព្យ ពិសេសខុនដូ។
លោក Ross Wheble ប្រធានក្រុមហ៊ុន Knight Frank Cambodia ត្រូវបានដកស្រង់សម្តីចេញពីកាសែតចិន SCMP ដោយលោកបានថ្លែងថា វិស័យអចលនទ្រព្យនៅទីក្រុងភ្នំពេញកំពុងរីកចម្រើន ខណៈតំបន់សំខាន់ៗមួយចំនួន កំពុងមានសក្តានុពលសម្រាប់គម្រោងអភិវឌ្ឍន៍អចលនទ្រព្យ និងទាក់ទាញវិនិយោគិនជាច្រើន។
លោក Wheble បានថ្លែងថា តំបន់រីកចម្រើនសំខាន់ៗនៅពេលនេះ រួមមាន ខណ្ឌទួលគោក និងសែនសុខនៅភាគខាងជើង និងពាយ័ព្យនៃទីក្រុង មហាវិថីសម្តេចតេជោ ហ៊ុន សែន ទៅភាគខាងត្បូងទីក្រុង និងតំបន់ជ្រោយចង្វារនៅភាគឦសាននៃទីក្រុង។
លោកបានបន្តថា “តំបន់ទាំងនេះតំណាងឱ្យចក្ខុវិស័យ កំណើនរយៈពេលមធ្យម និងវែងល្អសម្រាប់វិនិយោគ ប៉ុន្តែអ្នកវិនិយោគគួរតែត្រៀមខ្លួនចាំ ក្នុងចន្លោះពី៥ទៅ៧ ឆ្នាំ បន្ទាប់ពីបញ្ចប់គម្រោង” ។
វិនិយោគិនគួរស្វែងយល់ ពីទីផ្សារគោលដៅវិនិយោគរបស់ខ្លួន។ លោក Wheble ផ្តល់ដំបូន្មានឱ្យមានយុទ្ធសាស្ត្រពិតប្រាកដ ដែលគួរតែត្រូវបានពិភាក្សាជាមួយអ្នកប្រឹក្សាផ្នែកអចលនទ្រព្យរបស់អ្នក។
លោកបានមានប្រសាសន៍ថា “ការពិចារណាសំខាន់ៗ ក៏នឹងរួមបញ្ចូលការសង្កតមើលក្រុមហ៊ុនអភិវឌ្ឍន៍ កំណត់ត្រា ហិរញ្ញវត្ថុបំរុង និងអ្នកម៉ៅការ ក្នុងកំឡុងពេលសាងសង់ជាដើម” ។ លោកបន្តថា “វិនិយោគិនគួរពិចារណាលើការប្រើប្រាស់ដីជុំវិញ និងស្រាវជ្រាវអ្វី ដែលកំពុងត្រូវបានអភិវឌ្ឍនៅជាប់នឹងគម្រោង ព្រោះវាអាចជះឥទ្ធិពលលើទេសភាព និងពន្លឺធម្មជាតិអនាគត ដែលជះឥទ្ធិពលដល់ការលក់ នៅពេលចង់លក់បន្ត” ។
ក្រុមហ៊ុន Knight Frank មើលឃើញពីការកើនឡើង នៃចំនួនអ្នកវិនិយោគពីហុងកុង ដែលឥឡូវនេះកំពុងសម្លឹង មើលឱកាសនៅកម្ពុជាទាំងអាជីវកម្ម និងការវិនិយោគក្នុងវិស័យអចលនទ្រព្យ ខណៈលំហូរវិនិយោគផ្ទាល់ពីបរទេស (FDI) ចូលមកប្រទេសកម្ពុជាត្រូវបានគាំទ្រដោយការវិនិយោគពីប្រទេសចិន។
ទោះបីការជួលក្នុងវិស័យខុនដូ លំដាប់ប្រណីតនៅភ្នំពេញបានធ្លាក់ចុះ២៥ ភាគរយចាប់តាំងពីដើមឆ្នាំ២០១៧ ដោយសារការផ្គត់ផ្គង់ មានការកើនឡើងគួរឱ្យកត់សម្គាល់ ប៉ុន្តែលោក Wheble ជឿជាក់ថា កម្ពុជានៅតែល្អសម្រាប់វិនិយោគិនបរទេស ក្នុងការពិចារណា។
លោកថ្លែងថា “វាទាមទារចំណេះដឹងទីផ្សារ និងការយល់ដឹងពីតម្រូវការនាពេលអនាគត។ ដើម្បីឱ្យទីផ្សារមាននិរន្តរភាព វាចាំបាច់ត្រូវជំរុញដោយតំរូវការក្នុងស្រុក ហើយវិនិយោគិនគួរតែផ្តោតលើគម្រោង ដែលមានតំលៃសមរម្យនៅកម្ពុជា” ៕ ប្រភព៖propertyarea
