លោក Jeff Bezos ស្ថាបនិកក្រុមហ៊ុនលក់ទំនិញអនឡាញ Amazon កាន់តែមានទៅៗហើយ ដោយពេលនេះទ្រព្យសម្បត្តិរបស់លោកបានកើនឡើងដល់ខ្ទង់ ២០០ពាន់លានដុល្លារ ជាមនុស្សដំបូងគេក្នុងប្រវត្តិសាស្ត្រដែលមានទ្រព្យសម្បត្តិច្រើនថ្នាក់នេះ។ នេះបើផ្អែកតាមទស្សនាវដ្ដី Forbes។
ទ្រព្យសម្បត្តិរបស់លោក Jeff Bezos បន្តកើនឡើងក៏ដោយសារតម្លៃភាគហ៊ុនរបស់ Amazon បន្តកើនឡើងឥតឈប់ ទោះបីជាមានជំងឺកូវីដ១៩វាយលុកសេដ្ឋកិច្ចសហរដ្ឋអាមេរិកក្ដី។ លោក Jeff Bezos បានប្រគល់ទ្រព្យសម្បត្តិ ២៥% ទៅដល់អតីតភរិយាក្នុងការលែងលះកាលពីឆ្នាំមុន ប៉ុន្តែមើលទៅទ្រព្យរបស់លោកហាក់មិនថមថយនោះឡើយ។
គួរដឹងថានៅក្នុងឆ្នាំ ២០២០ នេះ លោក Jeff Bezos អាចរកទ្រព្យសម្បត្តិបន្ថែមបានរហូតដល់ ៨៧,១ពាន់លានដុល្លារ បើផ្អែកតាមតួលេខចុងក្រោយរបស់ Bloomberg។ មិនមែនតែលោក Jeff Bezos នោះទេដែលកាន់តែមានឡើងអំឡុងវិបត្តិកូវីដ១៩ លោក Elon Musk ម្ចាស់ក្រុមហ៊ុន Tesla និងលោក Eric Yuan ម្ចាស់ក្រុមហ៊ុន Zoom ក៏ឃើញមានកំណើនទ្រព្យសម្បត្តិជាង ២ពាន់លានដុល្លារផងដែរ នៅចន្លោះខែមីនា និងខែមិថុនា៕
ប្រភព ៖ sabay
