ហ្វាំងឡង់ៈ ក្រុមហ៊ុនបច្ចេកវិទ្យា Wärtsilä របស់ប្រទេសហ្វាំងឡង់ បានចុះហត្ថលេខាលើកិច្ចព្រមព្រៀង ថែរទាំរោងចក្រថាមពលអគ្គីសនី ២០០មេហ្គាវ៉ាត់ នៅកម្ពុជារយៈពេល ៥ឆ្នាំ ចំពោះរោងចក្រអគ្គិសនី C7 គ្រប់គ្រងដោយអគ្គិសនីកម្ពុជា (EDC) ដែលមានទីតាំងស្ថិតនៅជិតរាជធានីភ្នំពេញ។
យោងតាមគេហទំព័រ www.powerengineeringint.com ចុះផ្សាយថា កិច្ចព្រមព្រៀងនេះ គឺត្រូវបានធ្វើជាមួយក្រុមហ៊ុន SchneiTec ដែលជាក្រុមហ៊ុនទទួលខុសត្រូវក្នុងការថែរក្សារោងចក្រថាមពល។ កិច្ចព្រមព្រៀងរយៈពេល៥ឆ្នាំនេះ គាំទ្រដល់ដំណើរការបាន និងភាពជឿជាក់នៃម៉ាស៊ីនប្រើប្រេងឥន្ធនៈ ៥០DF របស់ក្រុមហ៊ុន Wärtsilä ចំនួន១២គ្រឿង ដែលបង្កើតថាមពលសរុប ២០០មេហ្គាវ៉ាត់ទៅបណ្តាញអគ្គិសនីជាតិ។
ក្រុមហ៊ុន Wärtsilä នឹងផ្គត់ផ្គង់គ្រឿងបន្លាស់តាមតំរូវការ និងតាមផែនការថែទាំក៏ដូចជាការធ្វើវិនិច្ឆ័យពីចម្ងាយ ការណែនាំ និងការដោះស្រាយបញ្ហា ក្នុងករណីមានការបិទបណ្តោះអាសន្នដែលមិនបានគ្រោងទុក។ រោងចក្រអគ្គិសនី C7 របស់អគ្គិសនីកម្ពុជា (EDC) កំពុងដើរតួនាទីយ៉ាងសំខាន់ ក្នុងការឆ្លើយតបនឹងកង្វះខាតអគ្គិសនីនៅកម្ពុជា។
ម៉ាស៊ីនរបស់ក្រុមហ៊ុន Wärtsilä ផ្តល់នូវភាពបត់បែន និងលឿន ដើម្បីផ្តល់នូវស្ថេរភាពនៃបណ្តាញអគ្គិសនី ដែលមានតម្រូវការ ខណៈពេលប្រទេសកម្ពុជាបន្តប្រើប្រាស់កើនឡើងនៃថាមពលកកើតឡើងវិញ ជាពិសេសថាមពលពន្លឺព្រះអាទិត្យ។ ថាមពលកកើតឡើងវិញ ដែលបំពេញបន្ថែមដោយរោងចក្រថាមពលបាស ផ្ទុកថាមពលដែលអាចផ្លាស់ប្តូរបាននឹងធានា បាននូវការផ្គត់ផ្គង់ថាមពលមានស្ថេរភាពក្នុងតម្លៃទាបបំផុត។
លោក Tann Tourthang អគ្គនាយកក្រុមហ៊ុន SchneiTec Co.Ltd ឱ្យដឹងថា“ លោកបានសម្តែងការគាំទ្រពី ក្រុមហ៊ុន Wärtsilä ក្នុងការបង្កើនប្រសិទ្ធភាពនៃការថែរក្សារោងចក្រនេះ” ។ លោកបន្តថា “ក្នុងនាមជាអ្នកផ្គត់ផ្គង់ម៉ាស៊ីន ឧបករណ៍គ្រឿងបន្លាស់ដើម របស់ក្រុមហ៊ុន Wärtsilä ពិតជាមិនមានហានិភ័យ នៃការធ្វើឱ្យខូចដល់ដំណើរការ ឬភាពជឿជាក់ឡើយ” ។
លោក Nicolas Leong នាយកអាជីវកម្មថាមពលរបស់ក្រុមហ៊ុន Wärtsilä ប្រចាំនៅអាស៊ីខាងជើង និងអាស៊ីអាគ្នេយ៍ឱ្យដឹងដែរថា សេវាកម្មពីចម្ងាយរបស់យើង អាចជួយត្រួតពិនិត្យទិន្នន័យ ដែលកំពុងដំណើរការរបស់ម៉ាស៊ីន និងកំណត់អត្តសញ្ញាណភាពមិនប្រក្រតី។
លោកបន្តថា បន្ទាប់មកយើងអាចផ្តល់ជំនួយសកម្ម ដល់ក្រុមប្រតិបត្តិករនៅនឹងកន្លែង ដើម្បីធានាថាការបង្កើតថាមពលគ្មានការរំខាន និងរលូនដើម្បីផ្តល់អត្ថប្រយោជន៍ដល់ក្រុមហ៊ុន SchneiTec អគ្គិសនីកម្ពុជា និងនៅសង្គមកម្ពុជាទាំងមូល។
លោកថ្លែងថា “យើងនឹងជួយធ្វើឱ្យរោងចក្រថាមពល របស់ក្រុមហ៊ុន Wärtsilä នេះក្លាយជារោងចក្រថាមពលគំរូ ដោយមានប្រតិបត្តិការ និងថែទាំខ្ពស់បំផុតនៅក្នុងប្រទេសកម្ពុជា” ។
ក្រុមហ៊ុន Wärtsilä គឺជាក្រុមហ៊ុនដ៏ធំរបស់ ហ្វាំងឡង់ដែលផលិត និងផ្តល់ប្រភពថាមពល និងឧបករណ៍ផ្សេងទៀតនៅក្នុងទីផ្សារអន្តរជាតិ៕ប្រភព៖propertyarea
