បរទេស៖ តម្លៃប្រេងបានកើនឡើងលើសពី ១០០ ដុល្លារ (៧៤ ផោន) ក្នុងមួយបារ៉ែល ដែលជាការឈានដល់ កម្រិតខ្ពស់បំផុត អស់រយៈពេលជាង ៧ ឆ្នាំបន្ទាប់ពីប្រទេសរុស្ស៊ី បានចាប់ផ្តើមការឈ្លានពានអ៊ុយក្រែន។
យោងតាមសារព័ត៌មាន BBC ចេញផ្សាយនៅថ្ងៃទី២៤ ខែកុម្ភៈ ឆ្នាំ២០២២ បានឱ្យដឹងថា តម្លៃភាគហ៊ុនក៏បានធ្លាក់ចុះយ៉ាងគំហុកផងដែរ ហើយតម្លៃមាសបានកើនឡើង នៅពេលដែលវិនិយោគិនព្រួយបារម្ភ អំពីផលប៉ះពាល់ ដែលអាចកើតមាននៃជម្លោះ។
រុស្ស៊ី គឺជាប្រទេសនាំចេញប្រេងឆៅធំបំផុតទីពីរ ហើយក៏ជាអ្នកនាំចេញ ឧស្ម័នធម្មជាតិដ៏ធំបំផុត របស់ពិភពលោកផងដែរ។ តម្លៃប្រេងឡើងដល់ ១០៣ ដុល្លារក្នុងមួយបារ៉ែល ហើយ RAC បានព្រមានថា តម្លៃប្រេងរបស់ចក្រភពអង់គ្លេសត្រូវបានកំណត់ថា នឹងកើនឡើងបន្ថែមទៀត។
អ្នកប្រើប្រាស់នៅចក្រភពអង់គ្លេស កំពុងបង់ថ្លៃថាមពល និងឥន្ធនៈខ្ពស់រួចទៅហើយ ជាមួយនឹងតម្រូវការកើនឡើង បន្ទាប់ពីការបន្ធូរបន្ថយការរឹតបន្តឹង Covid៕ ប្រែសម្រួលៈ ណៃ តុលា
