តារាហុងកុងល្បីឈ្មោះ Chow Yun-fat ហៅអាចែ បានរៀបការប្រពន្ធដើម Candice Yu ក្នុងឆ្នាំ ១៩៨៣ បន្ទាប់មានទំនាក់ទំនងស្នេហានឹងគ្នា អស់រយៈពេល៥ឆ្នាំ ហើយលែងលះក្រោយរៀបការបាន៩ខែ ដោយតារាប្រុសនិយមដើរតួស្ដេចល្បែងរូបនេះ បានទៅរៀបការប្រពន្ធបច្ចុប្បន្នជនជាតិសិង្ហបុរីនាង Jasmine Tan នាឆ្នាំ ១៩៨៦។
ប្រពន្ធមុនរបស់អាចែ
បើតាមការចុះផ្សាយរបស់ Asiaone កាលពីឆ្នាំ ២០១៧ បានឱ្យដឹងថា តារាសម្ដែងស្រី Candice Yu និងម្ដាយរបស់អាចែ ហាក់មិនសូវចុះសម្រុងគ្នា ហើយនាងតែងតែធ្វើឱ្យម្ដាយក្មេក ពិបាកចិត្តជាមួយនឹងពាក្យរឹងរូស។
ពាក់ព័ន្ធនឹងការលែងលះនេះ អ្នកស្រី Candice Yu អតីតប្រពន្ធ បានទទួលស្គាល់ដែរថា ពិតជាមានរឿងបែបនេះមែន។
កាលនោះតារាសម្ដែងស្រីវ័យ៦០ឆ្នាំបន្តថា៖” ខ្ញុំនៅក្មេង ហើយរឹងរូស។ ខ្ញុំគិតអីនិយាយហ្នឹង ទើបមិនអាចនៅជាមួយម្ដាយរបស់គាត់បាន”។
តារាស្រីល្បីឈ្មោះជាតួកូននាគក្នុងរឿងភាគទូរទ្សន៍ Return of the Condor Heroes ឆ្នាំ២០០៦ បានបន្ថែមថា បើនាងមិនលែងគ្នាទេ នោះ Chow Yun-fat មិនបានក្លាយជាតារាល្បីឈ្មោះ លើឆាកអន្តរជាតិដូចសព្វថ្ងៃនោះទេ។
“បើយើងមិនបែកគ្នាទេ គាត់មិនអាចក្លាយជាតារាល្បីឈ្មោះលើអន្តរជាតិមួយរូបនោះទេ។ នោះជារឿងមួយដែលខ្ញុំមិនអាចជួយគាត់បាន។ ខ្ញុំមិនស្គាល់ប្រពន្ធគាត់ទេ (Jasmine Tan) ខ្ញុំមិនដែលជួបនាង តែនាងពិតជាជួយគាត់បានច្រើន”។ អ្នកស្រីបញ្ជាក់។
ក្រោយមក Candice Yu បានរៀបការជាមួយអ្នកជំនួញម្នាក់ឈ្មោះ Peter Chan ក្នុងឆ្នាំ ១៩៨៤ ហើយបានចែកផ្លូវគ្នាក្រោយរៀបការបាន ៨ឆ្នាំ៕ប្រភព៖Sabay
