តារាសម្ដែង និងជាអ្នកដឹកនាំរឿង Stepen Chow ដែលប្រិយមិត្តស្គាល់ថាជា ទិនហ្វី បានផ្ញើសារខ្លីមួយទៅកាន់អតីតដៃគូសម្ដែងដ៏សក្តិសម គឺលោក Ng Man Tat ក្រោយដឹងថា ដៃគូរូបនេះបានលាចាកលោកទៅហើយ។
ទិនហ្វី បង្ហោះសារនៅលើ IG របស់ខ្លួន ដោយភ្ជាប់ជាមួយរូបថតមួយសន្លឹក ដែលមានលោក និងដៃគូសម្ដែង។ រូបនោះ គឺជាការសម្ដែងរបស់លោកជាមួយនឹង Ng Man Tat ក្នុងរឿង “ក្រុមបាល់ទាត់សៅលីញ” ដ៏ល្បី។ សារខ្លីរបស់តារាសម្ដែង ដ៏មានប្រជាប្រិយ គឺសូមឲ្យមិត្តរួមអាជីពបានទៅសោយសុខនៅឋានសុគតិភព ដែលជាមួយគ្នាក៏មានប្រិយមិត្ត លោកជាច្រើនបានចូលមកសម្ដែងការសោកស្ដាយ ចំពោះការបាត់បង់តារាសម្ដែង ដ៏កំប្លែងដ៏ល្បី។
លោក Ng Man Tat ត្រូវបានគេរាយការណ៍ថា បាត់បង់ជីវិតនៅថ្ងៃទី ២៧ កុម្ភៈនេះ ដោយរោគមហារីកថ្លើម ក្នុងអាយុ ៧០ឆ្នាំ។ សារព័ត៌មានបានស្រង់សំដីមិត្តជិតស្និទ្ធ របស់សិល្បករជើងចាស់ គឺលោក Tin Kai Man ថា លោក Ng Man Tat បានបាត់បង់ជីវិតទៅហើយ នៅវេលាម៉ោង ៥ និង១៦នាទីម៉ោងនៅទីក្រុងហុងកុង នៅក្នុងមន្ទីរពេទ្យសហព័ន្ធរបស់ទីក្រុងនេះ។
Tin Kai Man បានប្រាប់សារព័ត៌មានទៀតថា មានមិត្តភ័ក្តជាច្រើនបាន ទៅសួរសុខទុក្ខ តារាសម្ដែងជើងចាស់សម្រាប់វិនាទីចុងក្រោយ។ គ្រានោះ Ng បានប្រាប់អ្នករាល់គ្នាថា លោកមានការឈឺចាប់ខ្លាំងណាស់ ហើយដើម្បីរំដោះការឈឺចាប់ លោកបានទទួលយក ការចាក់សារធាតុគីមីនៅរៀងរាល់ ៤ម៉ោងម្ដង។ ប៉ុន្តែវាជួយអ្វីតារាសម្ដែង មិនបានយូរទេ ហើយទីបំផុតលោក ក៏លាចាកលោកទៅ។
Ng Man Tat កើតនៅFujian ខេត្តភាគខាងត្បូងរបស់ចិន។ លោក និងគ្រួសារបានផ្លាស់ប្ដូរទីលំនៅមករស់នៅទីក្រុងហុងកុង ពេលដែលមានអាយុ ៧ឆ្នាំ។ នៅឆ្នាំ ១៩៧៣ លោកបានដាក់ចូលរួមវគ្គបណ្ដុះបណ្ដាលការសម្ដែង ហើយក្រោយមកលោក បានបោះជំហានផ្លូវការចូលឧស្សាហកម្មភាពយន្ត និងទូរទស្សន៍។
លោក ត្រូវបានគេស្គាល់ថា ជាដៃគូសម្ដែងសក្តិសមឥតខ្ចោះ ជាមួយទិនហ្វី។ ពួកគេទាំងពីរបានចូលសម្ដែងរួមគ្នា ក្នុងខ្សែភាពយន្តជាច្រើន និងបានក្លាយជាតារា ក្នុងដួងចិត្តរបស់មនុស្សជាច្រើន។ ស្នាដៃរបស់លោក បានជួយឲ្យមានរីកចម្រើនយ៉ាងខ្លាំង នៃភាពយន្តហុងកុងជាពិសេសក្នុងទសវត្សរ៍ទី ៨០។
ខ្សែភាពយន្ត Ng Man Tat បានសម្ដែងជាមួយ ទិនហ្វី មានដូចជា “Fight Back to School”, “A Chinese Odyssey”, “Shaolin Soccer” និង “Hail the Judge” ជាដើម។ ក្នុងរយៈជិត ៥ទសវត្សរ៍ Ng Man Tat បានទទួលពានរង្វាន់ជាច្រើន ហើយពានមួយដ៏គួរចាប់អារម្មណ៍ គឺពាន “តួសម្ដែងអមដ៏ឆ្នើម” ឬ “Golden Supporting Role”៕ ប្រភព៖ sabay
