ភ្នំពេញ ៖ តារាសម្ដែងស្រី អាណា រ៉ូស ក្រោយពីមានពាក្យចោទប្រកាន់ លួចទាក់ទង ប្ដីគេរួចមក ស្រាប់តែថ្ងៃនេះ នាងបានបង្ហោះសារ បង្ហាញពីប្រវត្តិសិក្សា និងការងាររបស់នាង ដើម្បីបញ្ជាក់ថា នាងជាមនុស្សមានចំណេះដឹងជ្រៅជ្រះ មិនយកវប្បធម៌ជេរបញ្ជោរ បង្ខូចកិត្តិយសអ្នកដទៃ ដើម្បីទាក់ទាញចំណាប់ អារម្មណ៍ឡើយ ។
គួរឱ្យដឹងថា មួយរយៈខ្លីមកនេះ អាណា រ៉ូស បានរងនូវការរិះគន់ និងវាយប្រហារពីសំណាក់ គូស្នេហ៍លោក អេដវីន គឺអ្នកនាង សុទ្ធ បញ្ចកា ។ ការវាយប្រហារនេះ គឺយោងតាមសារ ដែលបែកធ្លាយថា រ៉ូស ធ្លាប់បានរួមគ្រែជាមួយតារាសម្ដែង អេដវីន កាលពីជាង ១ឆ្នាំមុន ។
យ៉ាងណាក៏ដោយ ងាកមកមើលប្រវត្តិសិក្សា របស់តារាស្រី ដែលល្បីតែរឿង អាស្រូវរូបនេះ បានឱ្យឃើញថា នាងជាអតីតនិស្សិត បញ្ចប់ការសិក្សា ថ្នាក់បរិញ្ញាប័ត្រ នៅវិទ្យាស្ថាន វ៉ាន់ដា គណនេយ្យ ។ បន្ទាប់ពីរៀនចប់ នាងក៏បានចូលបម្រើការងារ នៅក្រុមហ៊ុនឯកជន មួយឈ្មោះ Fugi ខាងទិញដូរ ហាងឆេងលុយអន្តរជាតិ ហើយបន្ទាប់មកក៏បានផ្លាស់ប្ដូរការងារទៅធ្វើការនៅក្រុមហ៊ុន RFC ដែលជាក្រុមហ៊ុនទិញដូរ លុយអន្តរជាតិ ដូចគ្នា ។
នៅក្នុងសារ ដែលបង្ហោះ នៅលើគណនីហ្វេសប៊ុក An Na Rose បានឱ្យដឹងទៀតថា ក្រោយមកទៀត នាងបានទៅបម្រើការងារ ផ្នែកខាងលក់ អចលនទ្រព្យ មានដូចជា ខុនដូរ ផ្ទះល្វែង និងដីឡូតិ៍ជាដើម ។ ហើយចុងក្រោយក៏ចូលប្រឡូក ក្នុងវិស័យសិល្បៈ ព្រោះតែទឹកចិត្តស្រឡាញ់ ។
ទន្ទឹមនឹងការរៀបរាប់ ពីប្រវត្តិសិក្សានេះផងដែរ នាង អាណា រ៉ូស ក៏បានភ្ជាប់ពីស្ថានភាពគ្រួសាររបស់នាង ដោយមានឪពុកជា អតីតអ្នករកស៊ីឈើ និងក្រោយមកបាន បើកអាហារដ្ឋានមួយនៅស្រុកឆ្លូង ខេត្តក្រចេះ ឈ្មោះថា ហាងបុប្ផាជ្រោយថ្ម ។
យ៉ាងណាក៏ដោយ ទាក់ទងនិងប្រវត្តិសិក្សា ប្រវត្តិការងារ ក៏ដូចជាស្ថានភាពគ្រួសារលម្អិតរបស់ អាណា រ៉ូស នាងមិនបានផ្ដល់បទ សម្ភាសន៍បន្ថែមឡើយ ដោយក្រុមការងារ Lookingtoday បានទូរស័ព្ទទៅហើយ តែនាងប្រាប់ថា “ខ្ញុំសរសេរនៅលើហ្វេសប៊ុកហ្នឹង បងមើលទៅ ខ្ញុំភ្លេចអស់ហើយ” ៕
ដោយ៖ ម៉ានី
