ភ្នំពេញ៖ ក្រៅពីនិយមលេងស្ទីលតុបតែងខ្លួន និងពណ៌សក់ប្លែកៗហើយនោះ តារាចម្រៀងវ័យក្មេង សេន យូរី ហៅ យូរី ត្រូវបានគេមើលឃើញថា នាង កម្រលេងសម្ភារៈនិយមដូចមិត្តភក្តិដទៃទៀតណាស់ ហើយនាងក៏កម្រនឹងបង្ហោះសម្ញែងសម្ភារៈប្រើប្រាស់របស់នាងដែរ ដូចជាកាបូប ទូរស័ព្ទ រថយន្ត ជាដើម ។
ប៉ុន្តែថ្មីៗនេះ តារាចម្រៀងម្ចាស់បទ «ចាក់ទឹកដូង» រូប នេះបានលេងស្ទីល ជាមួយរថយន្តថ្មី ស៊េរីទំនើបម៉ាក MG ZS ដែលមើលទៅពិតជាទាន់សម័យតែម្តង ។
បើទោះជាមិនទាន់ដឹងថា តើរថយន្តថ្មីមួយគ្រឿងនេះ ជាកម្លាំងញើសឈាម បានមកពីសិល្បៈ ឬក្រៅសិល្បៈ យ៉ាងណាក៏ដោយ ក៏គេដឹងថា រថយន្តនេះគឺជាកាដូ សម្រាប់នាង មុនឆ្នាំ ២០២២ មកដល់។ ហើយនេះបើយោងតាមការលើកឡើងរបស់ទំព័រហ្វេសប៊ុក ផ្លូវការក្រុមហ៊ុន MG-Cambodia បានបង្ហោះសារថ្លែងអំណរគុណថា៖ «កាន់តែទាន់សម័យ និងទាក់ទាញពីកញ្ញា Yuri Zen សេន យូរី ជាមួយរថយន្ត MG ZS! សូមអរគុណកញ្ញា យូរី ដែលបានពេញចិត្ត និងជឿជាក់ក្នុងការជ្រើសរើសរថយន្ត MG ZS សម្រាប់ការធ្វើដំណើរដោយផ្តល់នូវភាពទំនើប និងលេចធ្លោ អមជាមួយរូបរាងយ៉ាងស៊ីវិល័យ និងមុខងារប្រើប្រាស់ដ៏ទាន់សម័យ ដែលជួយសម្រួលឱ្យការបើកបរកាន់តែងាយស្រួល និងមានផាសុកភាព។ សូមជូនពរបងស្រីឱ្យជួបតែសំណាងល្អ និងសុខសុវត្ថិភាពគ្រប់ការធ្វើដំណើរ»។
គួរឱ្យដឹងថា មិនមានអ្វីប្លែកទេ សម្រាប់រថយន្តទំនើបដែលមានតម្លៃប៉ុននេះ ព្រោះ យូរី ក៏ត្រូវបានគេដឹងថា ជាតារាចម្រៀងដែលមានហាងឆេងខ្ពស់ផងដែរកន្លងមក និង ក៏ត្រូវបានគេមើលឃើញ យូរី ជិះរថយន្តទំនើបៗម៉ាកល្បីៗដូចជា Rang Rover និង ឡង់គ្រីស័រ ស៊េរីថ្មីជាដើម ៕ ដោយ៖ ម៉ានី
