កូរ៉េ៖ បើយោងតាមចេញផ្សាយផ្លូវការរបស់គេហទំព័រ Channel news Asia បានប្រាប់ឲ្យដឹងថា តារាទាំង២ដួងត្រូវបានគេប្រទះឃើញជាមួយគ្នា ក្នុងពិធីមង្គលការរបស់តារាល្បីនាង Son Ye-jin និង លោកHyun Bin ដែល Gong ត្រូវបានគេនិយាយថា ចាប់បានកម្រងផ្កាកូនក្រមុំនាពេលនោះ។
តារាសម្ដែង K-drama លោក Gong Hyo-jin និងតារាចម្រៀងអាមេរិក-កូរ៉េ Kevin Oh គឺជាគូស្នេហ៍ជាផ្លូវការហើយ។ ព័ត៌មាននៃទំនាក់ទំនងនេះ ត្រូវបានបង្ហាញជាលើកដំបូង ដោយគេហទំព័រ Sports Chosun របស់កូរ៉េខាងត្បូង កាលពីថ្ងៃសុក្រ បន្ទាប់ពីអ្នកទាំង២ត្រូវបានគេប្រទះឃើញ នៅក្នុងពិធីមង្គលការរបស់តារា K-drama Son Ye-jin និង Hyun Bin ។
តារាស្រីវ័យ ៤២ ឆ្នាំជាមិត្តភ័ក្តិរបស់កូនក្រមុំយូរមកហើយនោះ ត្រូវបានគេរាយការណ៍ថា បានចាប់កម្រងផ្កាក្នុងពិធីមង្គលការថ្ងៃទី ៣១ ខែមីនា។ ឆ្លើយតបទៅនឹងរបាយការណ៍នេះ ភ្នាក់ងារគ្រប់គ្រង Soop របស់ Gong បានបញ្ជាក់កាលពីថ្ងៃសុក្រថា ព័ត៌មានទំនាក់ទំនងនេះគឺជាការពិត។ សេចក្តីថ្លែងការណ៍នោះ បានសរសេរថា វាជាការពិតដែលនាងមានទំនាក់ទំនងជាមួយ Kevin Oh។
ចំពោះថា តើអ្នកទាំង២នឹងរៀបការ ក្នុងពេលឆាប់ៗនេះដែរឬអត់នោះ ភ្នាក់ងារបញ្ជាក់ថា វាពិបាកនិយាយនៅឡើយទេ។ យើងនឹងចែករម្លែកសេចក្តីប្រកាសមួយទៀត ប្រសិនបើមានដំណឹងល្អនៅពេលខាងមុខ ចំណែកតារាចម្រៀង Oh មានអាយុ ៣១ ឆ្នាំក៏បានបញ្ជាក់ព័ត៌មាននេះតាមរយៈសំបុត្រមួយ នៅលើវេទិកាអ្នកគាំទ្រផ្លូវការរបស់លោក។
លោកបានសរសេរថា ដូចដែលអ្នកទាំងអស់គ្នាតែងតែគាំទ្រខ្ញុំ ហើយតាំងពីដំបូងខ្ញុំមិនអាចប្រាប់អ្នកបាន ខ្ញុំចង់ស្មោះត្រង់ជាមួយអ្នកទាំងស្រុង ខ្ញុំបានជួបមនុស្សអស្ចារ្យម្នាក់ ដែលខ្ញុំកំពុងណាត់ជួបដោយស្មោះ ខ្ញុំដឹងព័ត៌មានអាច ហាក់ដូចជាភ្លាមៗចំពោះអ្នកមួយចំនួន ប៉ុន្តែខ្ញុំសុំឲ្យអ្នកមើលមកយើង ដោយសប្បុរស៕ ដោយ៖លី ភីលីព
