ភ្នំពេញ៖ ខណៈដែល MV បទចម្រៀង «អូនលែងប្ដីហើយ» ដែលច្រៀងដោយតារាពហុជំនាញអ្នកនាង ខាត់ សុឃីម កំពុងផ្ទុះការគាំទ្រខ្លាំងពីសំណាក់ទស្សនិកជននោះ ក៏មានការចាប់អារម្មណ៍ផងដែរទៅលើ MV មួយបទនេះដែលមានការចូលរួមសម្ដែងពីសំណាក់តារាប្រុសស្រីល្បីៗជាច្រើនរូប រួមទាំងមានវត្តមានចូលរួមពីសំណាក់ជនបរទេសជាច្រើនជាតិសាសន៍ផងដែរ ។
ជាមួយគ្នានេះដែរ អ្វីដែលធ្វើឱ្យទស្សនិកជនភ្ញាក់ផ្អើ់ល និងចាប់អារម្មណ៍បំផុតទៅលើ MV បទចម្រៀង «អូនលែងប្ដីហើយ» គឺគេឃើញមានវត្តមានរបស់អតីតតារាចម្រៀងដ៏មានប្រជាប្រិយភាពកាលពីជាង ១០ឆ្នាំមុន គឺលោក ម៉េង ប៊ុនឡូ ។ ដែលការលេចមុខនេះ ក្រោយពីលោកបានស្ងប់ស្ងាត់ពីការងារសិល្បៈជាច្រើនឆ្នាំ និងមានដំណឹងថា ម្ចាស់បទ «ចិត្តមារ» រូបនេះ កំពុងកាន់ដំណែងជាអ្នកគ្រប់គ្រងផលិតកម្មថ្មី និងធំមួយឈ្មោះ ដាវីត្រា មេឌៀ (Davitra Media) ។
ជាការពិតណាស់ អស់រយៈពេលច្រើនឆ្នាំមកហើយ ដែលវត្តមានរបស់លោក ម៉េង ប៊ុនឡូ បានរសាត់ឆ្ងាយចេញពីលើវិថីសិល្បៈ ហើយទន្ទឹមគ្នានោះគេក៏ដឹងថា ដោយសារក្រោយឆ្នាំ ២០១៦ ឬ ២០១៧ លោក បានទៅរស់នៅឯសហរដ្ឋអាមេរិក ដោយចាប់យកអាជីពជាតារាចម្រៀងនៅទីនោះ ។
យ៉ាងណាក៏ដោយ មួយរយៈចុងក្រោយនេះ ធ្លាប់មានព័ត៌មានថា លោក ម៉េង ប៊ុនឡូ កំពុងកាន់ដំណែងជាអ្នកគ្រប់គ្រងផលិតកម្មថ្មី និងធំមួយឈ្មោះ ដាវីត្រា មេឌៀ ដែលមានទីតាំងនៅផ្លូវជាតិលេខមួយ ឃុំគគី ស្រុកគៀនស្វាយ ខេត្តកណ្ដាល ។
គួរឱ្យដឹងថា ឭកកាលពីជាង ១០ឆ្នាំមុន ខណៈដែលផលិតកម្ម SSB និង 9Star នៅដំណើការ ដែលមានលោក ហ្វៃ សំអាង ជាចាងហ្វាង តារាចម្រៀង ម៉េង ប៊ុនឡូ ក៏ត្រូវបានមហាជនប្រុសស្រីទទួលស្គាល់ថា ជាតារាចម្រៀងមានប្រជាប្រិយភាពខ្លាំងគួរសម ព្រមទាំងមានរូបសម្បត្តិស្រស់សង្ហារផងដែរ ។ ហើយក្រៅពីជាតារាមច្រៀងហើយនោះ លោកក៏មានទេពកោសល្យក្នុងការសម្ដែង រហូតដល់អាចចាប់យកដំណែងជាតួឯកក្នុងរឿងកុនខ្នាតធំជាច្រើនរឿង ដូចជារឿង «ចៅពស់កេងកង»,«មនុស្សឬខ្មោច»,«នាង មច្ឆា» និងរឿងភាគ «មន្តមាយា» ជាដើម ដែលកាន់តែធ្វើឱ្យតារាប្រុសរូបនេះ មានឈ្មោះបោះសំឡេងជាលំដាប់ ។
យ៉ាងណាមិញ ក្រោយពីផលិតកម្ម SSB ត្រូវបានបិទ លោក ម៉េង ប៊ុនឡូ ក៏បានបន្តអាជីពលើវិថីសិល្បៈដូចដើម រហូតដល់កំលុងឆ្នាំ ២០១៥ ឬ ២០១៦ លោកបានបង្កើតផលិតកម្មខ្លួនឯងឈ្មោះថា BBL Production និង ក្រុមហ៊ុន KS audio Professional Sound ដែលទទួលរៀបចំគ្រប់គ្រងកម្មវិធីប្រគំតន្ត្រីផ្សេងៗ ៕ដោយ៖ ម៉ានី
