កូរ៉េ៖បើយោងតាមចេញផ្សាយផ្លូវការ របស់គេហទំព័រកម្សាន្តកូរ៉េខាងត្បូង Allkpop បានប្រាប់ឲ្យដឹងថា តារាចម្រៀងកូរ៉េខាងត្បូងលោក Hoon សមាជិកក្រុមតារាចម្រៀងបុ្រស U-KISS និងនាង Jisun អតីតសមាជិកក្រុមតារាចម្រៀងកូរ៉េខាងត្បូងស្រី Girl’s Day រៀបការជាមួយគ្នាជាផ្លូវការចុងខែនេះហើយ។
នៅថ្ងៃទី ៦ ខែឧសភា ផលិតកម្ម Tagno Music របស់លោក Hoon បានប្រកាសថា លោក Hoon និង នាង Hwang Jisun ដែលបានជួបគ្នាកាលពីអតីតកាល ដោយសារតែអាជីពរបស់ពួកគេបានសន្យាថានឹងរៀបការបន្ទាប់ពីបានទាក់ទងគ្នាអស់រយៈពេលជាយូរមកហើយ។
អ្នកទាំង២នឹងរៀបចំពិធីមង្គលការរបស់ពួកគេនៅថ្ងៃទី ២៩ ខែឧសភានៅទីក្រុងសេអ៊ូល។ ពិធីមង្គលការនឹងមានលក្ខណៈឯកជនដោយមានតែមិត្តភ័ក្តិ និងអ្នកស្គាល់គ្នាចូលរួម។ យើងសុំពរជ័យ និងលើកទឹកចិត្តសម្រាប់អនាគតអ្នកទាំង២បានសម្រេចចិត្តសរសេរជំពូកថ្មីក្នុងជីវិតរបស់ពួកគេ។
លោក Hoon បានបង្ហាញខ្លួនជាលើកដំបូងជាមួយ U-KISS នៅខែកញ្ញា ឆ្នាំ ២០០៨ ហើយនាង Jisun បានបង្ហាញខ្លួនជាលើកដំបូងជាមួយ Girl’s Day កាលខែកក្កដា ឆ្នាំ ២០១០ បានចាកចេញពីក្រុម Girls ក្នុងរយៈពេល២ ខែក្រោយមក។ ក្រោយមកនាងបានបង្ហាញខ្លួនជាសមាជិកក្រុម New.F.O. ជា JN និងជាសមាជិកនៃ S#aFLA ៕ដោយ៖លី ភីលីព
