អាមេរិក ៖ យោងតាមការចេញផ្សាយ ពីគេហទំព័រ UPI បានប្រាប់ឲ្យដឹងថា តារាចម្រៀង និងតារាសម្តែងដ៏ល្បីល្បាញ របស់អាមេរិក អ្នកនាង Jennifer Lopez បានបញ្ចេញបទចម្រៀងថ្មី ជាកិត្តិយស នៃខួបអាពាហ៍ពិពាហ៍ដំបូង របស់អ្នកនាងជាមួយស្វាមី គឺលោក Ben Affleck ។
តារាចម្រៀង និងតារាសម្តែងវ័យ ៥៣ ឆ្នាំរូបនេះបានបញ្ចេញបទចម្រៀង “Midnight Trip to Vegas” នៅថ្ងៃប្រារព្ធខួបអាពាហ៍ពិពាហ៍ក្នុង Las Vegas របស់នាងជាមួយលោក Affleck ។ អ្នកនាង Lopez និង លោក Affleck បានប្រារព្ធខួបអាពាហ៍ពិពាហ៍ជាផ្លូវការរបស់ពួកគេកាលពីថ្ងៃអាទិត្យ។
គូស្នេហ៍មួយគូនេះ ត្រូវបានគេប្រទះឃើញទៅញ៉ាំអាហារ ពេលល្ងាចនៅភោជនីយដ្ឋាន Giorgio Baldi ក្នុងក្រុង Santa Monica រដ្ឋ California ។ កាលពីថ្ងៃចន្ទ អ្នកនាង Lopez បានចែករម្លែករូបថត នៅលើ Instagram បង្ហាញអ្នកនាងក្នុងឈុតតូចពណ៌ស ដែលអ្នកនាងស្លៀក ទៅញ៉ាំអាហារពេលល្ងាច ជាមួយលោក Affleck ។
នាងបានបង្ហោះចំណងជើងថា “មួយឆ្នាំចាប់តាំងពីដំណើរកម្សាន្ត Midnight Trip To Vegas… ទៅ On The JLo ដើម្បីទទួលបានការភ្ញាក់ផ្អើលពិសេស… #ThisIsMeNow” ។ អ្នកនាង Lopez បានចែករម្លែកអត្ថបទចម្រៀង និងអត្ថបទខ្លីមួយនៃបទចម្រៀងរបស់នាងនៅក្នុងព្រឹត្តិបត្រ JLo៕
ដោយ៖លី ភីលីព
