ឥណ្ឌា៖យោង តាមការចេញ ផ្សាយពីគេហទំព័រ VN Express បានប្រាប់ឲ្យដឹងថា Miss Grand India បានបញ្ឈប់ជាផ្លូវការនូវភាពជាដៃគូជាមួយ Miss Grand International (MGI) ដោយសារការសម្រេចចិត្តខុសគ្នាពីចក្ខុវិស័យ និងគោលបំណង ភ្លាមៗ បន្ទាប់ពីបេក្ខនារីជនជាតិឥណ្ឌា នាង Rachel Gupta បានទទួលជ័យជម្នះក្នុងកម្មវិធីប្រកួត MGI ឆ្នាំនេះ ។
ការបែកបាក់នេះ ត្រូវបានប្រកាសតាមរយៈសេចក្តីថ្លែងការណ៍ ដែលចុះហត្ថលេខាដោយលោក Nikhil Anand ប្រធាននៃ Glamanand Entertainment Pvt ។ Ltd. ដែលគ្រប់គ្រងសិទ្ធិផ្តាច់មុខ Miss Grand India ហើយបានបង្ហោះនៅលើទំព័រ Instagram របស់ Miss Grand India ។
សេចក្តីថ្លែងការណ៍បានប្រកាសថា បន្ទាប់ពីការពិចារណាយ៉ាងយកចិត្តទុកដាក់ យើងបានសម្រេចចិត្តចែកផ្លូវជាមួយអង្គការ Miss Grand International ។ ការសម្រេចចិត្តរបស់យើង កើតចេញពីការទទួលស្គាល់ថា ចក្ខុវិស័យ និងគោលដៅរបស់យើង ខុសគ្នានៅពេលនេះ។
សេចក្តីថ្លែងការណ៍ក៏បានកត់សម្គាល់ថា ការបំបែកនេះនឹងជួយឲ្យស្ថាប័ន ផ្តោតលើការវិនិយោគ និងគម្រោងថ្មីៗ ត្រូវបានកំណត់ឲ្យបង្ហាញក្នុងពេលឆាប់ៗនេះ ។ លើសពីនេះទៀតបានគូសបញ្ជាក់ថា ភាពស្មោះត្រង់ គឺជាតម្លៃស្នូលសម្រាប់អង្គការ របស់ពួកគេ និងមានឥទ្ធិពលយ៉ាងខ្លាំង លើការសម្រេចចិត្តរបស់ពួកគេក្នុងការបំបែកខ្លួន។
សេចក្តីថ្លែងការណ៍បន្តថា យើងនៅតែប្តេជ្ញាចិត្តក្នុងការ ផ្តល់អាទិភាពលើការទុកចិត្ត ការតម្រឹម និងទំនាក់ទំនងរយៈពេលវែងនៅពេលដែលយើងឈានទៅមុខ ។ ស្ថាប័នបានសម្តែងនូវ មោទនភាពយ៉ាងខ្លាំងក្នុងការ អបអរជ័យជម្នះជាប្រវត្តិសាស្ត្ររបស់នាង Gupta អាយុ ២០ ឆ្នាំក្នុងកម្មវិធី Miss Grand International 2024។
សេចក្តីថ្លែងការណ៍បានប្រកាសថា នាង Rachel អ្នកនឹងក្លាយជាមហាក្សត្រីរបស់យើងជារៀងរហូត ហើយសមិទ្ធផលរបស់អ្នក គឺជាព្រឹត្តិការណ៍ប្រវត្តិសាស្ត្រសម្រាប់ប្រទេសរបស់យើង ។ យើងមានមោទនភាពក្នុងការ ឈរក្បែរអ្នក ហើយនឹងបន្តគាំទ្រអ្នកពេញមួយរជ្ជកាលរបស់អ្នក៕
