កូរ៉េខាងត្បូង ៖ នេះបើយោងតាមភ្នាក់ងាររបស់ Hyun គឺ VAST Entertainment បាននិយាយកាលពីថ្ងៃចន្ទថា គូស្នេហ៍តារាសម្ដែង Hyun Bin និង Son Ye-jin នឹងបរិច្ចាគ ប្រាក់ចំនួន ៣០០ លានវ៉ុន ស្មើនឹង ២០៤,000ដុល្លារ ដល់មជ្ឈមណ្ឌលវេជ្ជសាស្ត្រ Asan និងមជ្ឈមណ្ឌល វេជ្ជសាស្ត្រ Samsung ដោយបង្ហាញពីបំណងប្រាថ្នា របស់ពួកគេក្នុងការ ជួយព្យាបាលអ្នកជំងឺ នេះយោងតាមការ ចេញផ្សាយពីគេហទំព័រ Korea Times ។
នាយកដ្ឋានពេទ្យកុមារ នៃមន្ទីរពេទ្យទាំង២ ក៏ដូចជានាយកដ្ឋានសម្ភព និងរោគស្ត្រី នឹងទទួលបាន ១៥០ លានវ៉ុនក្នុងម្នាក់ៗ ។ សេចក្តីថ្លែងការណ៍ រួមរបស់ពួកគេ គូស្នេហ៍តារាល្បីមួយគូនេះ បានសម្តែង ការដឹងគុណយ៉ាង ជ្រាលជ្រៅ ចំពោះឱកាសដើម្បី ជួយអ្នកដទៃ និងបំណងប្រាថ្នាចែករម្លែកបេះដូងរបស់ពួកគេ បើទោះបីជាគ្រាន់តែ បន្តិចបន្តួចក៏ដោយ។
គូស្នេហ៍មួយគូនេះបាននិយាយថា យើងសង្ឃឹមថាភាពកក់ក្ដៅ របស់យើងនឹងទៅដល់អ្នក ដែលកំពុងឆ្លងកាត់ ពេលវេលាដ៏លំបាក ក្នុងពេលនេះ។ ប្តីប្រពន្ធនេះបានបន្ថែមថា ពួកគេមានអារម្មណ៍ថា មានកំហុសដែលមិនអាចពន្យល់បាន នៅពេលពួកគេឃើញកូនរបស់ពួកគេធំឡើងមានសុខភាពល្អ ដោយគិតពីកូនផ្សេងទៀត ដែលមិនមានសំណាង។
ពួកគេបានបន្ថែមថា យើងសង្ឃឹមដោយស្មោះថា កុមារដែលឈឺអាចជាសះស្បើយឡើងវិញ នូវស្នាមញញឹមដ៏បរិសុទ្ធ និងរីករាយរបស់ពួកគេ នៅពេលពួកគេធំឡើង មានសុខភាពល្អ ដើម្បីបំភ្លឺពិភពលោក ។
ការបរិច្ចាគដល់មជ្ឈមណ្ឌលវេជ្ជសាស្ត្រ Asan នឹងត្រូវចំណាយលើការព្យាបាល អ្នកជំងឺក្នុងស្ថានភាពលំបាក ខណៈ ប្រាក់ដែលបានបរិច្ចាគ ទៅមជ្ឈមណ្ឌលវេជ្ជសាស្ត្រ Samsung នឹងប្រើប្រាស់សម្រាប់ មូលនិធិអភិវឌ្ឍន៍ របស់មន្ទីរពេទ្យដើម្បីគាំទ្រ ដល់នាយកដ្ឋានផ្នែកសម្ភព និងរោគកុមារ។
លោក Hyun និង អ្នកនាង Son បានរៀបការ នៅខែមីនា ឆ្នាំ ២០២២ ហើយបានស្វាគមន៍កូនប្រុសដំបូង របស់ពួកគេ កាលខែវិច្ឆិកាឆ្នាំដដែល។ ពួកគេបានសម្តែងរួមគ្នាក្នុងរឿង “The Negotiation” ឆ្នាំ ២០១៨ និងរឿង “Crash Landing on You” របស់ទូរទស្សន៍ tvN ពីឆ្នាំ ២០១៩ ដល់ឆ្នាំ ២០២០៕
