ភ្នំពេញ៖ លោក គុជ បញ្ញាសា រដ្ឋលេខាធិការក្រសួងទេសចរណ៍ និងជាតំណាងដ៏ខ្ពង់ខ្ពស់ លោក សុខ សូកន រដ្ឋមន្ត្រីក្រសួងទេសចរណ៍ បានបញ្ជក់ថា ដោយបានទទួលការអនុញ្ញាតជាគោលការណ៍ដ៏ខ្ពង់ខ្ពស់ ពីរាជរដ្ឋាភិបាល ក្រសួងទេសចរណ៍ សហការជាមួយស្ថាប័នពាក់ព័ន្ធ និងក្រុមហ៊ុន ជីប ម៉ុង ក្នុងការរៀបចំព្រឹត្តិការណ៍អន្តរជាតិដ៍ធំ GUMBALL 3000 នឹងប្រមូលផ្ដុំកំពូលរថយន្តទំនើបៗ រាប់រយគ្រឿងដែលអ្នកបើកបរសុទ្ធសឹង ជាជនមានឥទ្ធិពល មហាសេដ្ឋីលំដាប់កំពូល ក្រុមតារាល្បីៗ និងកីឡាករលំដាប់ពិភពលោកជាច្រើនរូប នឹងមានវត្តមាននៅក្នុង ព្រះរាជាណាចក្រកម្ពុជា ចាប់ពីថ្ងៃទី១៥-១៧ ខែកញ្ញា ឆ្នាំ២០២៤ ខាងមុខនេះ ដើម្បីជំរុញការផ្សព្វផ្សាយយុទ្ធនាការ “ឆ្នាំទស្សនាសៀមរាប ២០២៤”។
ឧកញ៉ា លាង ពៅ (ភីធើរ) សមាជិកក្រុមប្រឹក្សាភិបាលក្រុមហ៊ុន ជីប ម៉ុង បានបញ្ជាក់ថា ព្រឹត្តិការណ៍ GUMBALL 3000 នឹងក្លាយជាព្រឹត្តិការណ៍ដ៏ធំថ្នាក់ជាតិមួយ ក្នុងឆ្នាំ២០២៤ ហើយក្រុមហ៊ុន ជីប ម៉ុង ត្រូវបានជ្រើសរើស ជាដៃគូសហការផ្លូវការ ក្នុងប្រទេសកម្ពុជាតែមួយគត់ ដោយមានការជ្រោមជ្រែង ពីក្រសួងទេសចរណ៍ ក៏ដូចជាស្ថាប័នពាក់ព័ន្ធនានា។
GUMBALL 3000 សម្រេចចិត្តចាប់ដៃ ជាមួយក្រុមហ៊ុន ជីប ម៉ុង ដោយសារបានយល់ច្បាស់ និងជឿជាក់លើកេរ្តិ៍ឈ្មោះ និងកិត្តិស័ព្ទរបស់ក្រុមហ៊ុន ជីប ម៉ុង ក្នុងទីផ្សារកម្ពុជា ជាក្រុមហ៊ុន ដែលមានមូលដ្ឋានគ្រឹះរឹងមាំ មានបទពិសោធន៍ក្នុងការរៀបចំព្រឹត្តិការណ៍ធំៗ អាចធ្វើការផ្សព្វផ្សាយពីព្រឹត្តិការណ៍នេះឲ្យកាន់តែបានទូលំទូលាយផងដែរ និងធ្វើឲ្យព្រឹត្តិការណ៍នេះទទួលបានជោគជ័យ។
ជាងនេះទៅទៀត ហេដ្ឋារចនាសម្ព័ន្ធពាណិជ្ជកម្មដ៏សម្បូរបែបរបស់ក្រុមហ៊ុន ជីប ម៉ុង នឹងផ្តល់ភាពងាយស្រួល ក្នុងការរៀបចំទទួលស្វាគមន៍ភ្ញៀវអន្តរជាតិ ដែលសុទ្ធសឹងជាជនមានឥទ្ធិពល មហាសេដ្ឋីលំដាប់កំពូល តារាល្បីៗ និងកីឡាករលំដាប់ពិភពលោកជាច្រើនរូប សំដៅយ៉ាងណាផ្តល់បទពិសោធន៍ នៃការស្នាក់នៅរបស់ពួកគេ ក្នុងប្រទេសកម្ពុជា ប្រកបដោយភាពរីករាយ និងអនុស្សាវរីយ៍មិនអាចបំភ្លេចបាន។
ការនាំយកនូវព្រឹត្តិការណ៍ GUMBALL 3000 រូមមានក្នុងគោលបំណងចំនួន៤សំខាន់ៗគឺ៖
១.ការជំរុញវិស័យទេសចរណ៍នៅកម្ពុជា និងកេរ្តិ៍ឈ្មោះរបស់ប្រទេសទៅកាន់ពិភពលោក។
២.ការចូលរួមចំណែកក្នុងសប្បុរសធម៌ដ៏ធំទៅមន្ទីរពេទ្យកុមារអង្គរ ខេត្តសៀមរាប។
៣.ការបើកឱកាសរវាងវិនិយោគគិនឯកជនបរទេស និងនៅក្នុងស្រុកបានជួបគ្នា។
៤.ការបង្កើតកំណត់ត្រាពិភពលោកហ្គីណេស ”ការចូលរួមចតឡានច្រើនជាងគេនៅមុខប្រាសាទអង្គរវត្ត”។
ដោយឡែកសម្រាប់សាធារណជនទូទៅ ដែលជាអ្នកគាំទ្ររថយន្តទំនើបៗគ្រប់ប្រភេទនៅកម្ពុជា និងបណ្តាប្រទេសនានាក៏អាចចុះឈ្មោះចូលរួម ក្នុងព្រឹត្តិការណ៍ដ៏ធំមួយនេះបានផងដែរ។ ការចូលរួមរបស់លោកអ្នកជាចំណែកមួយ ក្នុងការជួយទៅកុមារកម្ពុជា និងការបង្កើតនូវប្រវត្តិសាស្រ្ត សម្រាប់ប្រទេសកម្ពុជា៕
