អាជ្ញាធរនៅរដ្ឋធានីញូវដែល្លី បានប្រកាសស្ថានភាពគ្រាអាសន្ន អំពីការបំពុលអាកាសធាតុ ដោយបានបិទសាលារៀន និងសកម្មភាពសាងសង់ទាំងអស់នៅពេលមន្ត្រីក្រុងម្នាក់បានប្រៀបប្រដូចអាកាសធាតុក្នុងទីក្រុងទៅនឹងធុងហ្គាស។
វាបានកើតឡើងចំពេលមេដឹកនាំអាល្លឺម៉ង់បានអញ្ជើញមកដល់កាលពីថ្ងៃសុក្រទី១វិច្ចិកា ដើម្បីពិភាក្សាបញ្ហាពាណិជ្ជកម្ម គោលនយោបាយការបរទេសនិងសន្តិសុខជាមួយនាយករដ្ឋមន្ត្រីឥណ្ឌា លោកណារេនដ្រា ម៉ូឌី។ ផ្សែងអ័ព្ទដ៏ក្រាស់គ្របលើរដ្ឋធានីឥណ្ឌានៅសប្តាហ៍នេះមួយភាគធំ បង្កឡើងពីភ្លើងដុតដើមពោត ដុតស្មៅធ្វើចំការនៅក្នុងរដ្ឋក្បែរខាងនោះ។ អភិបាលក្រុងដល្លី លោក អាវីន កេរីវ៉ាល់ បាននិយាយថា ទីក្រុងនេះបានក្លាយជាធុងហ្គាសមួយ នៅពេលលោកប្រកាសថាអាជ្ញាធរនឹងចែកម៉ាសមុខ ហើយអំពាវនាវអោយអ្នកក្រុងដែល្លីប្រើវាដើម្បីទប់ទល់នឹងផ្សែងអ័ព្ទ។
ផ្សែងអ័ព្ទដ៏ក្រាស់គ្របលើរដ្ឋធានីដែល្លីកាលពីថ្ងៃ០១វិច្ឆិកា ជាហេតុនាំអោយអាជ្ញាធរប្រកាសបិទសាលារៀននិងប្រកាសស្ថានភាពគ្រាអាសន្នខាងសុខភាព។ ការវាស់កំរិតកខ្វក់ខ្យល់អាកាសកាលពីថ្ងៃសុក្រឃើញ៤៨៤ នៅលើកំរិត៥០០។ការវាស់នេះដើម្បីអោយដឹងកំរិតធាតុតូចល្អិត PM 2.5នៅក្នុងខ្យល់។កំរិតPM 2.5លើ៤០០ឡើងត្រូវគេចាត់ទុកថាគ្រោះថ្នាក់ចំពោះសុខភាព ជាពិសេសបង្កជម្ងឺផ្លូវដង្ហើមដោយសារតែកំទេចធូលី PM 2.5ចូលទៅក្នុងសួត។ ក្រុមហ៊ុនខ្លះថែមទាំងប្រាប់បុគ្គលិកកុំអោយប៉ះខ្យល់អាកាសកខ្វក់ ដោយអនុញ្ញាតអោយធ្វើការចេញពីផ្ទះ។
ខ្យល់អាកាសនៅក្នុងរដ្ឋធានីឥណ្ឌាឡើងដល់កំរិតអាក្រក់នេះកើតឡើងចំពេលអធិកាបតីអាល្លឺម៉ង់លោកស្រី អង់ហ្គេឡា មឺគែល បានមកដល់ក្រុងដែល្លី សំរាប់ដំណើរទស្សនកិច្ច៣ថ្ងៃ។នៅថ្ងៃសៅរ៍ទី២វិច្ឆិកា មេដឹកនាំអាល្លឺម៉ង់ត្រូវចុះហត្ថលេខាលើកិច្ចព្រមព្រៀងមួយចំនួនធំ ជាមួយលោកម៉ូឌី។ លោកស្រីនិងលោកម៉ូឌី មិនបានពាក់ម៉ាសមុខតាមការណែនាំរបស់គ្រូពេទ្យទេ នៅពេលពួកលោកត្រួតពលនៅវិមានប្រធានាធិបតីកាលពីថ្ងៃសុក្រ។ក្នុងពេលជាមួយគ្នា អភិបាលក្រុងនិងមន្ត្រីរបស់លោកបានចែកម៉ាសមុខ ហើយបញ្ជាអោយបិទសាលារៀនដល់ថ្ងៃ៥វិច្ឆិកាដើម្បីការពារកូនក្មេង។ អាជ្ញាធរក្រុងក៏បញ្ជាអោយផ្អាកការងារសាងសង់នៅក្នុងទីក្រុងដែលមានមនុស្ស២០លាននាក់និងបណ្តាទីក្រុងជុំវិញរហូតដល់ថ្ងៃ៥វិច្ឆិកា។ សូមបញ្ជាក់ថា នៅរៀងរាល់ឆ្នាំ កសិករនៅរដ្ឋពុនចាប និងហាយ៉ាណា ដុតដើមពោតងាប់ដើម្បីត្រៀមសម្រាប់រដូវដាំដុះថ្មី ដោយមិនស្តាប់ការណែនាំរបស់រដ្ឋទេ។
យោងតាមរូបភាពផ្កាយរណប ការមានឆេះជិត៣.២០០កន្លែងកាលពីថ្ងៃព្រហស្បតិ៍នៅរដ្ឋហាយ៉ាណានិងពុនចាប ដែលចូលរួមការបំពុលខ្យល់អាកាសនៅក្រុងដែល្លីចំនួន៤៤ភាគរយ៕
