បរទេស៖ អាជ្ញាធរតៃវ៉ាន់ តាមសេចក្តីរាយការណ៍ បាននិយាយប្រាប់ថា មន្រ្តីយោធាជាន់ខ្ពស់ តៃវ៉ាន់មួយរូប រួមជាមួយមនុស្ស៨នាក់ផ្សេងទៀត បានស្លាប់ បាត់បង់ជីវិត ក្នុងថ្ងៃព្រហស្បតិ៍នេះ នៅពេល ដែលឧទ្ធម្ភាគចក្រ Black Hawk បានធ្លាក់ទៅក្នុង តំបន់ភ្នំមួយ។
លោកឧត្តមសេនីយ៍ សែន យីមិង ដែលបម្រើការជាអគ្គសេនាធិការ នៃកងកម្លាំងប្រដាប់អាវុធ តៃវ៉ាន់ គឺជាមនុស្សម្នាក់ ក្នុងចំណោមមនុស្ស១៣នាក់ ជិះក្នុងឧទ្ធម្ភាគចក្រ នៅពេលធ្លាក់ ទៅក្នុងតំបន់ភ្នំ Wulai Mountain នៅជិតទីក្រុងតៃប៉ិ ហើយកងកម្លាំង ស្វែងរកនិងជួបសង្គ្រោះ បានចេញយ៉ាង ប្រញាប់ប្រញាល់ទៅកាន់កន្លែងកើតហេតុនោះ។
យោងតាម សេចក្តីរាយពីកាសែត UPI បានឲ្យដឹងថា លោក Hsiung Hou-chi ជាមេបញ្ជាការកងទ័ពអាកាស តៃវ៉ាន់ បាននិយាយប្រាប់ថា លោកឧត្តមសេនីយ៍ សែន យីមិង និងមនុស្ស៧នាក់ ផ្សេងទៀត ត្រូវបានគេបញ្ជាក់ថា បានស្លាប់បាត់បង់ជីវិតនៅពេលដែល ក្រុមអ្នកជួយសង្គ្រោះ ទៅដល់កន្លែងកើតហេតុ៕ ប្រែសម្រួល៖ប៉ាង កុង
