បាដាដ៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី០១ ខែកុម្ភៈ ឆ្នាំ២០២០ថា យោធាអ៊ីរ៉ាក់ បាននិយាយថា សរុបទៅមានគ្រាប់ផ្លោងចំនួន០៥គ្រាប់ បានផ្លោងចំមូលដ្ឋានស្នាក់នៅ របស់យោធាអាមេរិក នៅខេត្ត Nineveh ស្ថិតនៅភាគខាងជើងនៃប្រទេសអ៊ីរ៉ាក់ កាលពីថ្ងៃសុក្រម្សិលមិញ ។
ការិយាល័យផ្សព្វផ្សាយព័ត៌មាន រួមជាមួយសេនាធិការចម្រុះអ៊ីរ៉ាក់ បានឲ្យដឹងនៅក្នុង សេចក្តីប្រកាសព័ត៌មានមួយថា ការវាយប្រហារបានកើតឡើងកាលពីយប់មិញ នៅគ្រាដែលគ្រាប់ផ្លោងជាច្រើនគ្រាប់បានធ្លាក់មកលើដី នៅមូលដ្ឋានទ័ពអាកាស al-Qayyara នៅភាគខាងត្បូង រដ្ឋធានី Mosul ។
នៅក្នុងសេចក្តីប្រកាស ព័ត៌មានបានឲ្យដឹងថា មិនមានមនុស្ស ឬខូចខាតសម្ភារៈណាមួយ ដោយសារការវាយប្រហារនេះនោះទេ ។
ប្រភពមួយចេញពីសន្តិសុខ នៅក្រុងម៉ូស៊ុល បានប្រាប់ដល់ស៊ិនហួ ថា គ្រាប់រ៉ុក្កែត Katyusha បានធ្លាក់នៅលើដី នៅមូលដ្ឋានទ័ពអាកាស al-Qayyara ដោយមិនមាននរណាម្នាក់បាត់បង់ជីវិតឡើយ ៕
ប្រែសម្រួលដោយ៖ ម៉ៅ បុប្ផាមករា
