បរទេស៖ រដ្ឋមន្ត្រីសុខាភិបាលរុស្ស៊ី តាមសេចក្តីរាយការណ៍ ត្រូវបានគេដកស្រង់សម្តី កាលពីថ្ងៃសៅរ៍ថា អ្នកវិទ្យាសាស្ត្ររុស្ស៊ី គ្រោងតេស្តសាកល្បង ក្នុងរយៈពេលពីរសប្តាហ៍លើវ៉ាក់សាំង ប្រឆាំងនឹងមេរោគកូរ៉ូណា ហើយដំណឹងនេះ បានកើតមានឡើង ស្របពេលដែលអាជ្ញាធររុស្ស៊ី អនុម័តថ្នាំកូវីដ១៩ដំបូង របស់ប្រទេស។
ទីភ្នាក់ងារសារព័ត៌មានរុស្ស៊ី TASS បានដកស្រង់សម្តី លោករដ្ឋមន្ត្រីសុខភិបាល Mikhail Murashko យ៉ាងដូច្នេះថា “ការតេស្តសាកល្បង កំពុងតែប្រព្រឹត្តទៅ ហើយយើងគ្រោង ចាប់ផ្តើមសាកល្បងព្យាបាល ក្នុងពេលពីរសប្ដាហ៍ទៀត”។ លោកបន្ថែមទៀតថា អ្នកស្ម័ក្រចិត្ត ត្រូវបានជ្រើសរើសឲ្យចូលរួម ក្នុងការតេស្តសាកល្បងនោះ រួចរាល់ហើយ។
គួរបញ្ជាក់ថា ប្រទេសរុស្ស៊ី គឺជាប្រទេសជាប់ចំណាត់ថ្នាក់លេខ៣ ចំពោះករណីឆ្លងមេរោគកូរ៉ូណាខ្ពស់បំផុត បន្ទាប់ពីសហរដ្ឋអាមេរិក និងប្រទេសប្រេស៊ីល ហើយមន្ត្រីវិមានក្រឹមឡាំង បាននិយាយថា អ្នកស្រាវជ្រាវជាតិ កំពុងតែធ្វើការងារ លើគម្រោងថ្នាំវ៉ាក់សាំងផ្សេងៗគ្នា ជិត៥០ប្រភេទ៕ ប្រែសម្រួល៖ប៉ាង កុង
