សេនហ្វ្រេនស៊ីស្កូ៖ ក្រុមហ៊ុនផលិតរថយន្តអគ្គិសនី បានបង្ហាញថា ក្រុមហ៊ុន Tesla Inc បានចុះហត្ថលេខា លើកិច្ចព្រមព្រៀងរយៈពេល៣ឆ្នាំ ជាមួយក្រុមហ៊ុន Panasonic Corp ទាក់ទងនឹងការផលិត និងផ្គត់ផ្គង់អាគុយលីចូមនៅ Gigafactory ក្នុងរដ្ឋ Nevada យោងតាមការចេញផ្សាយ ពីគេហទំព័រជប៉ុនធូដេ។
ក្រុមហ៊ុន Tesla និង Panasonic ត្រូវបានគេរាយការណ៍ថា កំពុងពិភាក្សា ដើម្បីពង្រីកសមត្ថភាព របស់ក្រុមហ៊ុនបណ្តាក់ទុនរួមគ្នាលើអាគុយ។ ក្រុមហ៊ុន Panasonic បានលើកឡើង កាលពីខែឧសភាថា ខ្លួនកំពុងធ្វើការអភិវឌ្ឍអាគុយជាមួយក្រុមហ៊ុន Tesla អាចមានសមត្ថភាពខ្ពស់ជាងមុន។
ក្រុមហ៊ុន Tesla បាននិយាយថា កិច្ចព្រមព្រៀងបានចុះហត្ថលេខា កាលពីសប្តាហ៍មុន និងចូលជាធរមាននៅថ្ងៃទី ១ ខែមេសា ឆ្នាំ ២០២០ បានកំណត់លក្ខខណ្ឌ សម្រាប់ការប្តេជ្ញាចិត្តសមត្ថភាព ផលិតកម្មដោយ Panasonic និងការប្តេជ្ញាចិត្តបរិមាណទិញ ដោយក្រុមហ៊ុន Tesla ក្នុងរយៈពេល ២ ឆ្នាំដំបូងនៃកិច្ចព្រមព្រៀង។
ក្រុមហ៊ុន Tesla ក៏បានធ្វើវិសោធនកម្មលក្ខខណ្ឌទូទៅ នៃភាពជាដៃគូរបស់ខ្លួន ជាមួយក្រុមហ៊ុន Panasonic ដោយបានកែប្រែពាក្យនេះ ឲ្យផុតរយៈពេល ១០ឆ្នាំ បន្ទាប់ពីក្រុមហ៊ុន Panasonic សម្រេចបាននូវព្រឹត្តិការណ៍សំខាន់ៗ នៃការផលិត។ Panasonic លែងជាក្រុមហ៊ុន ផ្គត់ផ្គង់ថាមពលអាគុយផ្តាច់មុខ របស់ក្រុមហ៊ុន Tesla ប៉ុន្តែអាចងាកមករកស៊ី ផ្នែកអាគុយរួមគ្នា របស់សហរដ្ឋអាមេរិកវិញ ដោយសារតម្រូវការរថយន្តអគ្គិសនី របស់ក្រុមហ៊ុន Tesla កើនឡើង។
កាលពីខែមុនក្រុមហ៊ុន Tesla បានរាយការណ៍ ពីប្រាក់ចំណេញប្រចាំត្រីមាស ជាប់ៗគ្នាលើកទី ៣ របស់ខ្លួន ទោះបីជាមានផលប៉ះពាល់ ផ្នែកសេដ្ឋកិច្ចនៃជំងឺរាតត្បាតរាលដាល ដែលធ្វើឲ្យវិនិយោគិនភ្ញាក់ផ្អើល៕ ដោយ៖លី ភីលីព
