បរទេស៖ក្រសួងការបរទេសការបរទេសសហរដ្ឋអាមេរិក តាមសេចក្តីរាយការណ៍ បាននិយាយថា ក្រសួងនាពេលថ្មីៗនេះ ទើបបានអនុម័តលក់ឧទ្ធម្ភាគចក្រ MV-22 Osprey ចំនួន៨គ្រឿង មានទំហំទឹកប្រាក់ចំនួន២ពាន់លានដុល្លារ និងសម្ភារៈពាក់ព័ន្ធនានា ឲ្យទៅប្រទេសឥណ្ឌូនេស៊ី។
យោងតាមប្រភពព័ត៌មួយ ពីទីភ្នាក់ងារសារព័ត៌មាន UPI នៅថ្ងៃទី០៧ ខែកក្កដា ឆ្នាំ២០២០ បានឲ្យដឹងថា នៅក្នុងសេចក្តីថ្លែងការណ៍មួយរបស់ទីភ្នាក់ងារសហប្រតិបត្តិការសន្តិសុខការពារជាតិអាមេរិក បាននិយាយប្រាប់ថា ទីភ្នាក់ងារទើបបានជូនដំណឹងដល់រដ្ឋសភា អំពីភាពអាចទៅរួចនៃការលក់ឧទ្ធម្ភាគចក្រនោះ កាលពីថ្ងៃសៅរ៍។
គួរបញ្ជាក់ថា ការលក់នេះគឺផ្អែកទៅតាមសំណើរបស់រដ្ឋាភិបាលនៃប្រទេសឥណ្ឌូនេស៊ី សុំទិញឧទ្ធម្ភាគចក្រ MV-22 Block C Osprey ចំនួន៨គ្រឿង រួមជាមួយសម្ភារៈយោធាផ្សេងទៀត ដែលរួមមានទាំងកាំភ្លើងយន្ត ម៉ាស៊ីន រ៉ាដា ប្រព័ន្ធប្រាប់ទិសដៅនិងព្រមានអំពីមីស៊ីល ដែលមានទំហំចំណាយសរុបចំនួន២ពាន់លានដុល្លារ៕ ប្រែសម្រួល៖ប៉ាង កុង
