ក្រុមអ្នកវិទ្យាសាស្ត្របានឲ្យដឹងកាលពីថ្ងៃចន្ទកន្លងទៅ ថាពួកគេបានប្រទះឃើញឧស្ម័នម្យ៉ាងឈ្មោះ Phosphine ក្នុងពពកនៃភពសុក្រ ដែលជាសញ្ញាបញ្ជាក់ថាប្រហែលជាមានមីក្រុបរស់នៅលើភពនេះ និងជាសញ្ញាថាជីវិតក្រៅភពមានពិតមែន។
ក្រុមអ្នកវិទ្យាសាស្ត្រមិនបានរកឃើញទម្រង់ជីវិតពិតនោះទេ ប៉ុន្តែបានបញ្ជាក់ថាឧស្ម័ន Phosphine លើភពផែនដីគឺផលិតឡើងដោយបាក់តេរីដែលរីកលូតលាស់ក្នុងបរិយាកាសគ្មានអុកស៊ីហ្សែន។ គេបានប្រទះឃើញឧស្ម័ន Phosphine លើភពសុក្រ ដោយប្រើប្រាស់កែវយឹតអវកាស James Clerk Maxwell ក្នុងរដ្ឋ Hawaii និងបានបញ្ជាក់ពីវត្តមានរបស់វា ដោយប្រើប្រាស់នូវកែវយឹតរលកវិទ្យុ Atacama Large Millimeter។
គួរដឹងថាភពសុក្រជាភពដែលស្ថិតនៅក្បែរភពផែនដីជាងគេ ហើយវាមានទ្រង់ទ្រាយស្រដៀងគ្នា ប៉ុន្តែមានទំហំតូចជាភពផែនដី។ ភពនេះមានហ៊ុំព័ទ្ធដោយស្រទាប់បរិយាកាសក្រាស់ មានពោរពេញដោយឧស្ម័នពុល និងមានបរិយាសដែលក្ដៅខ្លាំង ពោលមានដល់ ៤៧១អង្សាសេ ក្ដៅអាចធ្វើឲ្យសំណរលាយបាន៕
ប្រភព៖sabay
