តារាសម្ដែង Stephen Chow ឬទិនហ្វី គឺជាតារាសម្ដែង និងអ្នកផលិតរឿង ដែលបានសាងស្នាដៃច្រើន រាប់ភ្លេច ក្នុងវិស័យភាពយន្តហុងកុង ។ កេរ្តិ៍ឈ្មោះរបស់លោក ត្រូវបានល្បីខ្ចរខ្ចាយពេញ ទ្វីបអាស៊ីតាំងតែពីឆ្នាំ ១៩៨០ មកដល់ពេលបច្ចុប្បន្ន តាមរយៈភាពយន្តជាច្រើន ដែលលោកបានសម្ដែង និងផលិតកន្លងមក ។
គ្មានអ្វីត្រូវបដិសេធទេ ថាទិនហ្វីជាតារាកំប្លែង ដែលតែងផ្ដល់នូវសំណើចដល់មនុស្ស គ្រប់គ្នាជំនួសដោយការកើតទុក្ខ ហើយមែនទែនទៅលោកក៏ជាតារាកំប្លែងសំណព្វចិត្ត របស់មនុស្សជាច្រើនដែរ កាលពីជាង ១០-២០ឆ្នាំមុន។ ចូលដល់ជីវិតឯកជន អាចនឹងខុសពីអ្វី ដែលគ្រប់គ្នាស្មាន ហើយបុរសម្នាក់នេះក៏ត្រូវបានគេដឹងថា ជាមនុស្សម្នាក់ដែលស្ងប់ស្ងាត់ ។ សូមមកដឹងរឿងពិតខាងក្រោមនេះ ដើម្បីស្គាល់ទិនហ្វីកាន់តែច្បាស់៖
១. តារាប្រុសដែលកើតនៅថ្ងៃទី ២២ ខែមិថុនា ឆ្នាំ១៩៦២ ក្នុងទីក្រុងហុងកុងនេះ កើតមកដើម្បីក្លាយជាអ្នកដឹកនាំ និងជាមនុស្សម្នាក់ ដែលមានការតាំងចិត្តខ្ពស់ ។ លោកតែងសម្រេចការងារអ្វីមួយ ដោយសម្រេចចិត្តយ៉ាងហ្មត់ចត់ ហើយទាមទារសេរីភាព មិនចូលចិត្តការរារាំង និងក៏មិនចូលចិត្តឲ្យអ្នកណាម្នាក់មករាំងស្ទះគោលដៅ ដែលលោកខំប្ដេជ្ញាដែរ។
២. លោកមានបងប្អូន ៣នាក់ ស្រី ២ ប្រុសម្នាក់ ហើយលោក គឺជាកូនប្រុសទី២ ។ គ្រួសារដែលមានសមាជិក ៥នាក់នេះ មានជីវភាពយ៉ាប់យ៉ឺនខ្លាំង ដោយរស់នៅប្រជ្រៀតគ្នា ក្នុងខ្ទមតូចមួយ ហើយញ៉ាំបាយជាមួយទឹកស៊ីអ៊ីវស្ទើររាល់ថ្ងៃ។
៣. ពេលទិនហ្វីមានអាយុ ៧ឆ្នាំ ឪពុកម្ដាយរបស់លោក ក៏បានសម្រេចលែងលះគ្នា ហើយលោកក៏ត្រូវទទួលការ ចិញ្ចឹមបីបាច់ពីម្ដាយតែឯង។ ដោយសារបន្ទុកធំ ត្រូវរែកពន់តែឯង ដូចនេះទើបម្ដាយ បង្ខំចិត្តធ្វើការដល់ទៅ ៣កន្លែង ហើយក៏ព្រោះរវល់ពេក មិនសូវមានពេលមើលថែកូន ទើបម្ដាយបញ្ជូន Stephen និងកូនស្រីម្នាក់ ឲ្យទៅនៅជាមួយនឹងជីដូន ។
៤. តាមប្រភពព័ត៌មាន ដែលចុះផ្សាយនាពេលកន្លងមកបានលើកឡើងថា ចាប់តាំងពីឪពុកម្ដាយលែងគ្នាមក Stephen ប្រែជាក្មេងម្នាក់ដែលលែងសូវនិយាយស្ដីច្រើន ឬ មនុស្ស Introvert។
៥. តាំងពីក្មេងមក Stephen គឺជាអ្នកគាំទ្រប្ដូរផ្ដាច់របស់ Kung Fu និង Bruce Lee ប៉ុន្តគ្រួសារលោកមានជីវភាពក្រីក្រពេក ដូចនេះគ្មានសមត្ថភាពបញ្ជូនកូនឲ្យចូលរៀន នៅសាលាគុនអ្វីទេ ហើយជាលទ្ធផល Stephen បានត្រឹមហាត់រៀន តាមទូរទស្សន៍ប៉ុណ្ណោះ ។ Stephen សម្រេចដើរតាមគន្លងរបស់រៀមច្បងសិល្បៈ ដោយតាំងចិត្តថា ធំឡើងលោកចង់ក្លាយជាតារាសម្ដែងដែរ។
៦. ទោះបីម៉ឺងម៉ាត់ខ្លាំងបែបនេះមែន តែ Stephen ក៏ជាមនុស្សមានទំនួលខុសត្រួវខ្ពស់ តែងការពារ និងផ្ដល់នូវភាពកក់ក្ដៅ ចំពោះមនុស្សដែលលោកស្រឡាញ់ ប៉ុន្តែអ្វីដែលចង់បានត្រឡប់មកវិញ សុំត្រឹមតែការគោរព និងការយកចិត្តទុកដាក់ទេ។
៧. និយាយពីទំនាក់ទំនងស្នេហាវិញ Stephen បានទាក់ទងស្រឡាញ់ជាមួយនឹងតារាសម្ដែង Karen Mok ក្រោយរួមការងារជាមួយគ្នាច្រើនរឿងមក ប៉ុន្តែក៏បានបែកគ្នា។ ក្រោយមកលោកក៏បានទាក់ទងជាមួយនឹង Yu Wenfeng ហើយស្រឡាញ់គ្នា បាន ១០ឆ្នាំ ពួកគេក៏សម្រេចបែកគ្នានៅឆ្នាំ ២០១០។ តាំងពីពេលនោះមកដល់ពេលបច្ចុប្បន្ន Stephen ក៏លែងលូកលាន់រឿងស្នេហាតទៀត ។
៨. ងាកចូលភាពយន្តដែល Stephen បានសម្ដែងវិញ មានច្រើន ប៉ុន្តែ ៥រឿង ដែលធ្វើឲ្យគ្រប់គ្នាលើកលោកជា «ស្ដេចកំប្លែងហុងកុង» មានដូចជា៖
រឿង «All’s Well, Ends Well» ចេញឆ្នាំ ១៩៩២
រឿង «Hail the Judge» ចេញឆ្នាំ ១៩៩៤
រឿង «from Beijing With Love» ចេញឆ្នាំ ១៩៩៤
រឿង «Out of the Dark» ចេញឆ្នាំ ១៩៩៥
រឿង «King of Comedy» ចេញឆ្នាំ ១៩៩៩
៩. បើតាមវិបសាយ Wealthy Genius បានឲ្យដឹងថាទ្រព្យសរុបរបស់ Stephen គិតត្រឹមឆ្នាំ ២០២១នេះ មានចំនួន ៣៥លានដុល្លារ។ ដោយចំណូលទាំងនេះខ្លះបានពីការវិនិយោគ ក្នុងវិស័យអចលនទ្រព្យ ក៏ដូចជាភាពយន្តទាំងឡាយដែលលោកបានសម្ដែង និងផលិតកន្លងមក។
១០. ស្នាដៃការងារក្នុងវិស័យភាពយន្ត៖
ក្នុងនាមជាតារាសម្ដែង Stephen សម្ដែងបាន ៥៨រឿង (គិតចាប់ពីឆ្នាំ ១៩៨៨ ដល់ ២០០៨)
ក្នុងនាមជាអ្នកដឹកនាំរឿង Stephen ដឹកនាំបាន ១២រឿង (គិតចាប់ពីឆ្នាំ ១៩៩៣ ដល់ ២០១៩)
ក្នុងនាមជាផលិតកររឿង Stephen ផលិតបាន ៧រឿង (គិតចាប់ពីឆ្នាំ ២០០៨ ដល់ ២០១៩)៕
sabay
