របាយការណ៍ របស់ក្រុមប្រឹក្សាមាសពិភពលោក បានឱ្យដឹងថា ក្នុងរយៈពេល ៩ខែ នៃឆ្នាំ២០២៣នេះ បណ្តាធនាគារកណ្តាល បានបង្កើនការទិញមាសសរុបប្រមាណ ៨០០តោនឯណោះ កើនឡើង ១៤% ដែលលើសពីការរំពឹងទុក ។ ការទិញមាសដ៏ច្រើនសន្ធឹកសន្ធាប់នេះ កើនឡើងខ្លាំងគឺបន្ទាប់ពីការផ្ទុះសង្គ្រាមរវាងអ៊ីស្រាអែល និងក្រុមហាម៉ាស់ ដែលបារម្ភពីការផ្គត់ផ្គង់ថាមពល ។
ក្នុងចំណោមនោះ អ្នកដែលប្រមូលទិញមាសច្រើនជាងគេ គឺធនាគារកណ្តាលចិន ចំនួន ១៨១តោន បន្ទាប់មកគឺ ប៉ូឡូញ ៥៧តោន និងតួកគី ៣៩តោន។
ក្រៅពីមូលហេតុ ដ៏ខាងលើនេះ ក៏នៅមានកត្តាដទៃទៀតដែរ ដែលជំរុញការទិញមាស ។ បញ្ហាអតិផរណា និងការធ្លាក់ចុះរូបិយបណ្ណក្នុងប្រទេសជាច្រើនធៀបនឹង លុយដុល្លារអាមេរិក បានបង្ខំឱ្យពួកគេត្រូវបង្កើនការស្តុកទុកមាស ដើម្បីទប់ទល់នឹងវិបត្តិនេះ ។
លោក John Reade ប្រធានអ្នកយុទ្ធសាស្រ្តទីផ្សារ របស់ក្រុមប្រឹក្សាមាសពិភពលោក បានរំពឹងថា សម្រាប់រយៈពេលពេញមួយឆ្នាំនេះ ការទិញមាសនឹងកើនលើសជាងឆ្នាំមុនដែលមានចំនួន ១០៨១តោន ៕
