កម្មវិធីកម្សាន្តដែលមានអ្នកប្រើប្រាស់ប្រមាណ ២៦,៥ លាននាក់នៅសហរដ្ឋអាមេរិក TikTok បច្ចុប្បន្នកំពុងស្ថិតក្រោមការស៊ើបអង្កេតរបស់រដ្ឋាភិបាល ជុំវិញការព្រួយបារម្ភថាកម្មវិធីដ៏ធំមួយនេះមានលួចបញ្ជូនទិន្នន័យសម្ងាត់ទៅកាន់ប្រទេសចិន។
មិនខុសពីការចោទប្រកាន់ទៅលើក្រុមហ៊ុន Huawei ដែលលោក Donald Trump បានដាក់បម្រាមទៅលើក្រុមហ៊ុនផលិតទូរសព្ទរបស់ប្រទេសចិនមួយនេះតាំងពីខែឧសភា និងបញ្ឈប់មិនឲ្យក្រុមហ៊ុនក្នុងស្រុកចាប់ដៃគូសហការទៀតផង។
សារព័ត៌មាន Reuters បានចុះផ្សាយថារដ្ឋាភិបាលអាមេរិកកំពុងបើកការស៊ើបអង្កេតយ៉ាងសកម្មទៅលើកម្មវិធីដែលមានមូលដ្ឋានក្នុងទីក្រុងប៉េកាំង TikTok ស្ថិតក្រោមទ្រនំនៃក្រុមហ៊ុនមេ ByteDance។
ជាងនេះគណៈកម្មាធិការ CFIUS ក៏បានបើកការពិនិត្យយ៉ាងដិតដល់ដើម្បីឲ្យធានាបានថាជុំវិញកិច្ចព្រមព្រៀងដែល ByteDance បានចាយលុយរាប់លានទិញយក Musical.ly របស់អាមេរិកកាលពីឆ្នាំទៅ គឺពិតជាមានសុវត្ថិភាពនិងពុំប៉ះពាល់ដល់សន្តិសុខជាតិ។
គួររំឭកថា TikTok ជាកម្មវិធីប្រភេទចែកចាយវីដេអូកម្សាន្តខ្លីៗដែលមានរយៈពេលចន្លោះពី ៣ ទៅ ១៥ វិនាទី ដោយរបាយការណ៍ពី Sensor Tower នៅខែកញ្ញា App នេះជាប់ឈ្មោះឈរលេខរៀងទី ១ មានអ្នកទាញយកច្រើនបំផុតនៅលើ Google Play Store និងលេខ ២ នៅលើ App Store របស់អាមេរិក៕
ប្រភព៖Sabay
