តាមរបាយការណ៍របស់ Golden Gate Weather Services ប្រចាំសហរដ្ឋអាមេរិក បានឲ្យដឹងថាមានកូនក្មេងចំនួន ៨០០ នាក់បានបាត់បង់ជីវិតនៅក្នុងរថយន្តដែលមានកម្ដៅក្ដៅ គិតចាប់តាំងពីឆ្នាំ ១៩៩៨ មក។
ករណីថ្មីចុងក្រោយបំផុតគឺកើតឡើងកាលពីចុងសប្ដាហ៍កន្លងទៅ នៅពេលដែលក្មេងប្រុសអាយុ ៤ ឆ្នាំម្នាក់ ក្នុង Saint Paul រដ្ឋ Minnesota បានបាត់បង់ជីវិតក្រោយពីឪពុកទុកចោលនៅក្នុងរថយន្ត SUV រយៈពេលរាប់ម៉ោង។
Golden Gate Weather Services បានបញ្ជាក់ថាឧបទ្ទវហេតុនេះកើតឡើងពេលដែលសីតុណ្ហភាពមានត្រឹមប្រមាណ ២១ អង្សាប៉ុណ្ណោះ និងនិយាយថាខាងក្នុងរថយន្តអាចឡើងកម្ដៅក្ដៅខ្លាំង ទោះសីតុណ្ហភាពខាងក្រៅមិនសូវក្ដៅក្ដី។
ក្រុមហ៊ុនសេវាកម្មអាកាសធាតុខាងលើនេះបានបញ្ជាក់ថា ៥៤% នៃករណីចំនួន ៧៩៥ លើក ដែលកើតឡើងអំឡុងពេល ២១ ឆ្នាំកន្លងទៅនេះ បណ្ដាលមកពីឪពុកម្ដាយ ឬអ្នកមើលក្មេង ភ្លេចកូនក្មេងនៅក្នុងរថយន្ត។ ហេតុផលសំខាន់ពីរទៀតរួមមាន ក្មេងៗអាចចូលរថយន្តដោយខ្លួនឯង (២៦,៣%) និងការទុកចោលពីអ្នកមើលក្មេងដោយដឹងខ្លួនថាទុកចោល (១៨,៩%)។
នៅក្នុងឆ្នាំ ២០១៨ នៅសហរដ្ឋអាមេរិក មានការកត់ត្រាថាកូនក្មេង ៥២ នាក់បានស្លាប់ដោយសារកាតទុកចោលក្នុងរថយន្តក្ដៅ។ នេះបើតាមវិបសាយ Kids and Cars។ នៅឆ្នាំ ២០១៧ តួលេខមានចំនួន ៤៣ នាក់។ អង្គភាពនេះបានកត់ត្រាការស្លាប់ចំនួន ៥ មកហើយនៅឆ្នាំ ២០១៩ ដែលកើតឡើងតាំងពីថ្ងៃទី ៤ ខែមេសា។
ដូចនេះជាការណែនាំ ទោះស្ថិតក្នុងកាលៈទេសៈណាក៏ដោយ មិនត្រូវទុកក្មេងចោលនៅក្នុងរថយន្តតែម្នាក់ឯងនោះទេ។ លោកសាស្ត្រាចារ្យ David Diamond ប្រចាំវិបសាយ Kids and Cars ក៏បានសំណូមពរដល់ក្រុមហ៊ុនផលិតរថយន្ត ឲ្យបន្ថែមមុខងារការពារដើម្បីរំឭកដល់ឪពុកម្ដាយអំពីកូនក្មេងដែលអង្គុយនៅកៅអីក្រោយ៕
ប្រភព៖sabay
