ក្រុមហ៊ុន Honda បានប្រកាសកាលពីចុងខែមិថុនាកន្លងទៅថា ខ្លួននឹងបញ្ឈប់ការផលិតម៉ូតូ Honda Super Cub (ឬអាគុប) ៥០សេសេ ទៀតហើយ ចាប់ពីខែវិច្ឆិកា ឆ្នាំ២០២៥តទៅ។
ការសម្រេចចិត្តនេះ ធ្វើឡើងដើម្បីស្របតាមច្បាប់នៃការរឹតបន្តឹងការបញ្ចេញផ្សែងរបស់ប្រទសជប៉ុន សម្រាប់ម៉ូតូ។ ហេតុនេះទើបធ្វើឱ្យ Honda មានការពិបាក ឬត្រូវចំណាយច្រើនទៅលើការឌីហ្សាញប្រព័ន្ធបញ្ចេញផ្សែងរបស់ម៉ូតូម៉ាស៊ីនតូចបែបនេះ។
ខណៈការប្រើប្រាស់ម៉ូតូអគ្គិសនី មានការកើនឡើងច្រើន ធ្វើឱ្យម៉ូតូម៉ាស៊ីនតូចៗ មានការលក់ធ្លាក់ចុះ។ ជាក់ស្តែងការលក់ម៉ូតូអាគុប៥០សេសេនេះ ក្នុងឆ្នាំ២០២៣ មានចំនួនត្រឹមតែ ៩២ ៨២៤គ្រឿងប៉ុណ្ណោះ ដែលទាបជាងឆ្ងាយពីចំណុចកំពូល ២,៧៨លានគ្រឿង ក្នុងឆ្នាំ១៩៨២។ យ៉ាងណាក៏ដោយ Honda នៅតែមានចំណែកទីផ្សារម៉ូតូ ៨០% ក្នុងប្រទេសជប៉ុន។
គួររំលឹកថា ម៉ូតូ Honda Super Cub 50 បានបង្ហាញខ្លួនជាលើកដំបូងក្នុងឆ្នាំ១៩៥៨។ Honda បានសម្រេចការលក់ម៉ូតូម៉ូឌែលអាគុប៥០សេសេនេះ រហូតដល់ ១០០លានគ្រឿង នៅទូទាំងពិភពលោក ដែលជាម៉ូឌែលម៉ូតូលក់ដាច់បំផុតក្នុងប្រវត្តិសាស្រ្ត។
បើទោះបីជាម៉ូតូអាគុប៥០ នឹងត្រូវចូលនិវត្តន៍មែន ប៉ុន្តែម៉ូតូអាគុបម៉ាកផ្សេងទៀតដូចជា Cub CT 125 គឺនៅតែបន្តផលិតដដែល៕
