ប្រទេសឥណ្ឌូនេសុី ត្រូវបានគេរាយការណ៍ថា បានឈានដល់ដំណាក់កាលព្រៀមព្រាងគ្នា ទិញថ្នាំគ្រាប់ព្យាបាលកូវីដ ពីក្រុមហ៊ុន Merck របស់សហរដ្ឋអាមេរិក។ នេះបើតាមការចុះផ្សាយ របស់សារព័ត៌មាន CNA។
លទ្ធផលនៃការធ្វើតេស្តខ្នាតធំ បានបង្ហាញថា ថ្នាំគ្រាប់ molnupiravir មានប្រសិទ្ធភាព អាចព្យាបាលជំងឺកូវីដ១៩។ មួយវិញទៀត ថ្នាំគ្រាប់មួយនេះ បានកាត់បន្ថយអ្នកជំងឺព្យាបាល នៅមន្ទីរពេទ្យ និង ទប់ស្កាត់ការស្លាប់ បាន៥០% ថែមទៀតផង។ ក្រុមហ៊ុន Merck បានស្នើសុំការអនុញ្ញាត ប្រើប្រាស់បន្ទាន់ ពីសហរដ្ឋអាមេរិក កាលពីដើមខែតុលាកន្លងទៅ។
មន្រ្តីសុខាភិបាលឥណ្ឌូនេសុី Budi Gunadi Sadikin បានថ្លែងប្រាប់បណ្តាញសារព័ត៌មាន បន្ទាប់ពីបានទៅទស្សនកិច្ចផ្ទាល់ នៅក្រុមហ៊ុន Merck ថា “កិច្ចព្រៀមព្រាងទិញ ថ្នាំគ្រាប់ព្យាបាលកូវីដឈ្មោះ molnupiravir ឈានដល់ដំណាល់កាល ចុងក្រោយហើយ។ បើមិនមានអ្វីផ្លាស់ប្តូរទេ ថ្នាំគ្រាប់នេះ នឹងដឹកមកដល់ប្រទេសឥណ្ឌូនេសុី នៅចុងឆ្នាំ២០២១នេះ” ៕ Source: Sabay
