ក្រុមអ្នកស្រាវជ្រាវជនជាតិអាមេរិកបានរកឃើញថា ស្ត្រីដែលអស់រដូវ មានគ្រោះថ្នាក់ខ្ពស់ក្នុងការកើតជំងឺគាំងបេះដូងនិងដាច់សសៃឈាមខួរក្បាល ក៏ប៉ុន្តែ ប្រសិនបើពួកគេបានទទួលទានផ្លែប៉ោម២ផ្លែ ក្នុងមួយថ្ងៃ នោះពួកគេអាចកាត់បន្ថយជាតិកូឡេស្តូរ៉លនៅក្នុងរាងកាយបាន២៥ភាគរយ។
យោងទៅតាមប្រភពពត៌មាន UPI.com បានឲ្យដឹងថា ក្រុមអ្នកស្រាវជ្រាវមួយក្រុមនៅមហាវិទ្យាល័យនៃរដ្ឋហ្លរីដា បាននិយាយថាការសិក្សាបានពឹងផ្អែកទៅលើ ការពិនិត្យសុខភាពរបស់ស្ត្រីចំនួន ១៦០នាក់ដែលពួកគេទាំងនោះ ដល់អាយុអស់រដូវ។ នៅក្នុងនោះផងដែរស្ត្រីចំនួន ៨០នាក់ត្រូវបានឲ្យទទួលទានផ្លែប៉ោមក្រៀមចំនួន ៧៥ក្រាម ស្មើនឹងផ្លែប៉ោមស្រស់ ២ផ្លែ ក្នុងមួយថ្ងៃ ចំណែកស្ត្រីចំនួន៨០នាក់ទៀតបានទទួលទានផ្លែ prunes ដោយឲ្យស្មើនឹងបរិមាណផ្លែប៉ោមដែរ។
ក្រុមអ្នកស្រាវជ្រាវបាននិយាយថា បន្ទាប់មក អ្នកស្ម័គ្រចិត្តនីមួយៗ ត្រូវបានទៅធ្វើតេស្តឈាមរៀងរាល់៣ខែម្តង សំរាប់រយៈពេល១ឆ្នាំ។
ការសិក្សាដែលត្រូវបានចេញផ្សាយនៅក្នុងទស្សនាវដ្តីរបបអាហារ និងអនាម័យនៃអាហារបានបង្ហាញឲ្យឃើញថា បន្ទាប់ពីរយៈពេល៣ខែនៃការពិនិត្យកំរិតជាតិកូឡេស្តូរ៉លនៅក្នុងរាងកាយរបស់ក្រុមស្ត្រីដែលបានទទួលទានផ្លែប៉ោមរួចមក ស្រ្តីទាំងនោះបានចុះជាតិកូឡេស្តូរ៉លនៅក្នុងខ្លួនចំនួន ១៦ភាគរយ។
ដោយ៖ ហង្ស សុបញ្ញា
