FUKUOKA៖ កិច្ចប្រឹងប្រែងស្តារឡើងវិញ បានបន្តនៅថ្ងៃសៅរ៍ ក្នុងតំបន់ Kyushu ភាគនិរតីរបស់ប្រទេសជប៉ុន ដែលត្រូវបានបំផ្លាញ ដោយភ្លៀងយ៉ាងខ្លាំង កាលពីមួយសប្តាហ៍មុន ដែលបណ្តាលឱ្យ មានទឹកជំនន់និងការបាក់ដី បណ្តាលឱ្យមនុស្ស យ៉ាងហោចណាស់ ១៦ នាក់ កំពុងបាត់ខ្លួននៅឡើយ ។
យោងតាមសារព័ត៌មាន Kyodo News ចេញផ្សាយនៅថ្ងៃទី១១ ខែកក្កដា ឆ្នាំ២០២០ បានឱ្យដឹងថា គ្រោះមហន្តរាយនេះបានបណ្តាល ឱ្យមនុស្ស ៦៣ នាក់ស្លាប់នៅក្នុងតំបន់ ហើយមានភ្លៀងធ្លាក់ ច្រើននៅតាមតំបន់នានា ។ យ៉ាងណាក៏ដោយ ជំនួយពីអ្នកស្ម័គ្រចិត្ត ត្រូវបានរារាំងដោយ ការរីករាលដាល នៃមេរោគឆ្លងវីរុស កូរ៉ូណាទៅវិញ ដោយក្រុងជាច្រើន សំរេចចិត្តស្វាគមន៍ជំនួយ តែពីអ្នកស្រុក នៃខេត្តរបស់ពួកគេផ្ទាល់។
កាលពីមុនសហគមន៍រងគ្រោះ ដោយគ្រោះមហន្តរាយ នៅក្នុងប្រទេសជប៉ុន បានទាក់ទាញអ្នកស្ម័គ្រចិត្ត មកពីទូទាំងប្រទេស ជាពិសេសនៅចុងសប្តាហ៍។
យោងតាមក្រសួងដែនដីជប៉ុន បានអោយដឹងថា ទន្លេចំនួន ៩២ នៅក្នុងខេត្តចំនួន ១០ បានលិចលង់ច្រាំងទន្លេ ហើយមានការខូចខាតចំនួន ២៥១ ករណីដែលបណ្តាល មកពីការបាក់ដីដែលប្រហែល ១ ភាគ ៥ នៃទឹកជំនន់បានកើតឡើង នៅក្នុងខេត្ត Kumamoto រងការវាយប្រហារដោយទឹកភ្លៀង៕
ប្រែសម្រួលៈ ណៃ តុលា
