វ៉ាស៊ីនតោន ៖ អ្នកនាំពាក្យម្នាក់ បានប្រកាសនៅថ្ងៃព្រហស្បតិ៍ថា លោក Herman Cain អតីតបេក្ខជនប្រធានាធិបតី នៃគណបក្សសាធារណរដ្ឋ របស់សហរដ្ឋអាមេរិក បានទទួលមរណភាព ក្នុងអាយុ ៧៤ ឆ្នាំ បន្ទាប់ពីបានប្រយុទ្ធនឹងជំងឺ COVID-19 មិនបានជោគជ័យ។
លោក Dan Calabrese និពន្ធនាយកវេបសាយ របស់លោក Cain បានសរសេរថា“ យើងដឹងថាពេលលោកចូល មន្ទីរពេទ្យដំបូងជាមួយនឹងជំងឺកូវីដ-១៩ ថានេះនឹងក្លាយជាការ ប្រយុទ្ធដ៏លំបាកមួយ។
លោក Calabrese បានលើកឡើងថា មានសូចនាករដែលមានក្តីសង្ឃឹម ដោយយោងទៅលើវេជ្ជបណ្ឌិត ដែលបានលើកឡើងតិច ជាងមួយសប្តាហ៍មុនថា “ពួកគេគិតថា លោកនឹងជាសះស្បើយ” ។
និពន្ធនាយករូបនេះបានពន្យល់ថា“ យើងធូរចិត្តដែលត្រូវគេប្រាប់រឿងនោះ ហើយបានផ្សព្វផ្សាយព័ត៌មាន តាមប្រព័ន្ធផ្សព្វផ្សាយសង្គម ហើយយើងក៏មានការព្រួយបារម្ភយ៉ាងខ្លាំង អំពីការពិតដែលថា លោកមិនដែលឈានដល់ចំណុច ដែលគ្រូពេទ្យអាចនាំលោកទៅដំណាក់កាល នៃការជាសះស្បើយនោះទេ៕
ដោយ ឈូក បូរ៉ា
