បរទេស៖ កិច្ចព្រមព្រៀង រវាងប្រទេសអ៊ីស្រាអែល និងសហភាពអារ៉ាប់រួម នឹងមិនធានាដល់សន្តិភាព នៅក្នុងតំបន់នោះទេ នេះបើយោងតាមសម្តីទីប្រឹក្សាពិសេស ស្តីពីកិច្ចការអន្តរជាតិ របស់ប្រធានរដ្ឋសភាអ៊ីរ៉ង់មួយរូប ដែលមានប្រតិកម្ម ចំពោះកិច្ចព្រមព្រៀងថ្ងៃព្រហស្បតិ៍ ស្តីពីការធ្វើចំណងមិត្តភាព ឲ្យមានភាពប្រក្រតីឡើងវិញ។
លោក Hossein Amir-Abdollahian ដែលក៏ជាអតីតអនុរដ្ឋមន្ត្រី មួយរូបផងនោះ បាននិយាយ លើបណ្ដាញសង្គមធ្វីតធ័រដូច្នេះថា មធ្យោបាយថ្មីរបស់សហភាពអារ៉ាប់រួម សម្រាប់ការធ្វើឲ្យប្រក្រតីឡើងវិញ នូវចំណងមិត្តភាព ជាមួយប្រទេសអ៊ីស្រាអែលនោះ មិនរក្សាសន្តិភាពនិងសន្តិសុខនោះទេ ប៉ុន្តែបម្រើដល់អំពើឧក្រិដ្ឋកម្ម ដែលកំពុងតែប្រព្រឹត្តរបស់អ៊ីស្រាអែល។
យោងតាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន Yahoo News នៅថ្ងៃទី១៤ ខែសីហា ឆ្នាំ២០២០ បានឲ្យដឹងថា ទីប្រឹក្សាពិសេសអ៊ីរ៉ង់រូបនោះ បាននិយាយបន្តដូច្នេះទៀតថា “អាកប្បកិរិយារបស់ទីក្រុងអាប៊ូដាប៊ី មិនមានយុត្តិកម្ម ដោយបែរទៅមើលបុព្វហេតុប៉ាឡេស្ទីន ហើយជាមួយកំហុសជាយុទ្ធសាស្ត្រនេះ សហភាពអារ៉ាប់រួម នឹងត្រូវរុំព័ទ្ធដោយភ្លើងអ៊ីស្រាអែល៕ ប្រែសម្រួល៖ប៉ាង កុង
