តូក្យូ៖ យោងតាមការស្ទង់មតិ ដោយវិទ្យាស្ថានវេជ្ជសាស្រ្ត គ្រប់គ្រងដោយរដ្ឋ បានអោយដឹងថា ក្មេងជាង ៧០ ភាគរយនៃសិស្សសាលា នៅក្នុងប្រទេសជប៉ុន មានអារម្មណ៍ស្ត្រេស ឬតានតឹង ដោយសារតែការរីករាលដាល នៃមេរោគឆ្លងវីរុសកូវីដ១៩។
យោងតាមសារព័ត៌មាន Kyodo News ចេញផ្សាយនៅថ្ងៃទី២៦ ខែកញ្ញា ឆ្នាំ២០២០ បានឱ្យដឹងថា ជាការឆ្លើយតបទៅនឹងការស្ទង់មតិ ដែលអាចផ្តល់ចម្លើយបានច្រើន, ៧២ ភាគរយនៃសិស្សបឋម, មធ្យមសិក្សាទុតិយភូមិ និងមធ្យមសិក្សា បាននិយាយថា ការគិតអំពីវីរុសធ្វើឱ្យពួកគេមានអារម្មណ៍មិនល្អ ឬប៉ះពាល់ ដល់ការផ្តោតអារម្មណ៍របស់ពួកគេ។
ក្នុងពេលដំណាលគ្នានោះ ៩ ភាគរយនៃអ្នកឆ្លើយតប បានរាយការណ៍ថា ពេលខ្លះធ្វើបាបខ្លួន ឬប្រើអំពើហឹង្សាទៅលើសមាជិកគ្រួសារ ឬ ទៅលើសត្វចិញ្ចឹម។
ការស្ទង់មតិ ក៏បានរកឃើញថា ៣២ ភាគរយ នឹងមិនចង់អោយគេដឹងថា តើពួកគេឬសមាជិកគ្រួសាររបស់ពួកគេឆ្លងវីរុសនោះទេ ខណៈ ៤៧ ភាគរយជឿជាក់ថា មនុស្សភាគច្រើននឹងរក្សាការសម្ងាត់។
២២ភាគរយទៀត បាននិយាយថា ពួកគេនឹងមិនចង់លេង ឬដើរលេងជាមួយអ្នកដែលឆ្លងវីរុសនេះទេ សូម្បីតែពួកគេបានជាសះស្បើយក៏ដោយ៕
ប្រែសម្រួលៈ ណៃ តុលា
