បរទេស៖ មូលនិធិវិនិយោគផ្ទាល់ របស់សហព័ន្ធរុស្ស៊ី (RDIF) បាននិយាយ កាលពីថ្ងៃអង្គារថា គ្រូពេទ្យនិងបុគ្គលិកពេទ្យអាមេរិក បានចូលរួមនៅក្នុងសន្និសីទកាសែតដំបូង ស្តីពីវ៉ាក់សាំងការពារជំងឺឆ្លង វីរុសកូរ៉ូណា របស់ប្រទេសរុស្ស៊ីនៅសហរដ្ឋអាមេរិក និងបានបង្ហាញចំណាប់អារម្មណ៍យ៉ាងខ្លាំង ចំពោះឱសថ Sputnik V ។
យោងតាមសារព័ត៌មាន Sputnik ចេញផ្សាយនៅថ្ងៃទី២៩ ខែកញ្ញា ឆ្នាំ២០២០ បានឱ្យដឹងថា វេជ្ជបណ្ឌិតនិងបុគ្គលិកពេទ្យ ជាងមួយរយនាក់ មកពីមជ្ឍមណ្ឌលវេជ្ជសាស្រ្ត Maimonides ដែលជាមន្ទីរពេទ្យឈានមុខគេមួយ របស់សហរដ្ឋអាមេរិកនៅជួរមុខ នៃការប្រយុទ្ធប្រឆាំងនឹងរោគរាតត្បាត COVID-១៩ ចាប់តាំងពីខែមីនាឆ្នាំ ២០២០ បានបង្ហាញការចាប់អារម្មណ៍យ៉ាងខ្លាំង ទៅលើវ៉ាក់សាំង Sputnik V របស់ប្រទេសរុស្ស៊ីនៅឯសន្និសីទ កាសែត តាមអ៊ីនធឺណិត។
អ្នកវិទ្យាសាស្ត្រមកពីមជ្ឈមណ្ឌល Gamaleya បានប្រាប់ទស្សនិកជនអាមេរិកអំពីការ អភិវឌ្ឍវ៉ាក់សាំងរុស្ស៊ីនិងវឌ្ឍនភាព នៃដំណើរការសាកល្បង ក្រោយការចុះឈ្មោះ។
អ្នកស្រាវជ្រាវជនជាតិរុស្ស៊ី បានសង្កត់ធ្ងន់ទៅលើគុណសម្បត្តិ នៃវេទិកាភ្នាក់ងារចម្លងវ៉ិចទ័រ adenoviral របស់មនុស្សដែលត្រូវបានប្រើនៅក្នុងថ្នាំ Sputnik V លើបច្ចេកវិទ្យាដែលមិនត្រូវ បានគេយកមកប្រើប្រាស់ ដូចជាវេទិកាវ៉ិចទ័រស្វា adenoviral ឬបច្ចេកវិទ្យា mRNA ដែលមិនបានសិក្សាអំពីផលប៉ះពាល់សក្តានុពល ដូចជាផលប៉ះពាល់លើការ មានកូន ឬហានិភ័យជំងឺមហារីកក្នុងរយៈពេលវែង៕
ប្រែសម្រួលៈ ណៃ តុលា
