បរទេស ៖ មហាសេដ្ឋីជនជាតិ ជប៉ុនលោក Yusaku Maezawa បានអញ្ជើញសមាជិក សាធារណៈចំនួន ៨ នាក់ឱ្យចូលរួមជាមួយលោក ធ្វើដំណើរកម្សាន្តជុំវិញព្រះច័ន្ទ តាមជើងហោះហើរ SpaceX របស់ លោក Elon Musk ។
យោងតាមសារព័ត៌មាន BBC ចេញផ្សាយកាលពីថ្ងៃទី៣ ខែមីនា ឆ្នាំ២០២១ បានឱ្យដឹងថា លោក Yusaku Maezawa បាននិយាយនៅក្នុង វីដេអូតាមរយៈបណ្តាញសង្គម Twitter ថា “ ខ្ញុំចង់ឲ្យ ប្រជាជន ដែលមកពីគ្រប់មជ្ឈដ្ឋានចូលរួម” ។
លោកបន្តថា លោកនឹងរ៉ាប់រងសម្រាប់ ចំណាយលើការធ្វើដំណើរទាំងមូល ដូច្នេះអ្នកដែលជិះលើយន្ដហោះ នឹងហោះហើរដោយឥតគិតថ្លៃ។ បេសកកម្មនេះមានឈ្មោះថា dearMoon គ្រោងនឹងហោះហើរនៅឆ្នាំ ២០២៣ ។
មហាសេដ្ឋីជនជាតិជប៉ុនរូបនេះ បាននិយាយទៀតថា អ្នកដាក់ពាក្យត្រូវបំពេញ តាមលក្ខណៈវិនិច្ឆ័យពីរគឺពួកគេគួរតែជំរុញ សកម្មភាពអ្វីក៏ដោយ ដែលពួកគេមានដើម្បីជួយអ្នកដទៃ និងសង្គម កាន់តែច្រើន តាមមធ្យោបាយ ណាមួយ ហើយពួកគេមានឆន្ទៈ ជួយសមាជិកនាវិកដទៃទៀត ដែលមានសេចក្តីប្រាថ្នាស្រដៀងគ្នានេះ ។
លោកបានបន្ថែមថា“ ខ្ញុំបានទិញកៅអីទាំងអស់ ដូច្នេះវានឹងក្លាយជាការជិះបែបឯកជន” ៕
ប្រែសម្រួលៈ ណៃ តុលា
