អ៊ូឡាន បាទ័រ ៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី០២ ខែឧសភា ឆ្នាំ២០២១ថា ទីភ្នាក់ងារឧតុនិយម និងតាមដានបរិស្ថានជាតិ របស់ប្រទេសម៉ុងហ្គោលី បានឲ្យដឹងនៅថ្ងៃអាទិត្យនេះថា កម្លាំងខ្យល់បោកបក់ខ្លាំង និងព្យុះខ្សាច់ បានវាយប្រហារ មកលើផ្នែកជាច្រើន នៃប្រទេសម៉ុងហ្គោលី ។
ទីភ្នាក់ងារត្រួតពិនិត្យអាកាសធាតុ បានឲ្យដឹងនៅក្នុងសេចក្តីប្រកាសមួយថា កម្លំាំងខ្យល់ខ្លាំង និងព្យុះខ្សាច់ បានបោកបក់មកលើភាគខាងត្បូង នៃខេត្ត Umnugovi និង Dundgov ហើយខេត្តភាគខាងលិច ដូចជានៅ Govi-Altai និង Bayankhongor និងតំបន់ភាគកណ្តាល ដូចជា រដ្ឋធានី អ៊ូឡាន បាទ័រ និងខេត្តមួយចំនួនទៀត គឺ Uvurkhangai, Arkhangai និង Tuv ។
ទីភ្នាក់ងារបានព្រមានដល់ពលរដ្ឋ ពិសេស អ្នកមានលំនៅដ្ឋាន រស់នៅមិនជាប់លាប់ និងអ្នកគង្វាលសត្វ ដើម្បីបង្កើនការប្រុងប្រយ័ត្នខ្ពស់ប្រឆំាង នឹងគ្រោះមហន្តរាយ ដែលអាចកើតមានឡើង ។
កម្លាំងខ្យល់ខ្លាំង ព្យុះខ្សាច់ និងព្យុះព្រិល តែងតែកើតមានឡើងនៅពេលមានព្រឹត្តិការណ៍ អាកាសធាតុក្នុងអំឡុង និទាឃរដូវ នៅក្នុងប្រទេសម៉ុងហ្គោលី ដែលជាប្រទេសមួយក្នុង ចំណោមប្រទេសជាច្រើន ដែលមានអ្នកតាំងលំនៅដ្ឋាន មិនជាប់លាប់ នៅក្នុងពិភពលោក ៕
ប្រែសម្រួលដោយ៖ ម៉ៅ បុប្ផាមករា
