ប៉េកាំង៖ អ្នកនាំពាក្យចិនកាលពីថ្ងៃព្រហស្បតិ៍ បានលើកឡើងថា រាល់ការប៉ុនប៉ងជ្រៀតជ្រែក ចូលកិច្ចការផ្ទៃក្នុងរបស់ចិន ធ្វើឱ្យប៉ះពាល់ដល់អធិបតេយ្យភាពរបស់ចិន ឬធ្វើឱ្យប៉ះពាល់ដល់មុខមាត់ របស់ប្រទេសចិន ក្រោមលេសផ្សេងៗគ្នា ដែលត្រូវបរាជ័យ។ វាជាការឆ្លើយតបទៅនឹងសេចក្តីថ្លែងការណ៍ថ្មីៗនេះ របស់រដ្ឋមន្ត្រីការបរទេសនៃក្រុមប្រទេសទាំង ៧ (G7) ទាក់ទងនឹងប្រទេសចិន។
សេចក្តីថ្លែងការណ៍រួមត្រូវបាន ចេញដោយកិច្ចប្រជុំរដ្ឋមន្រ្តីការបរទេស G7 កាលពីថ្ងៃពុធ។ វាបានសម្តែងការព្រួយបារម្ភលើស៊ីនជាំង ទីបេ ហុងកុង និងស្ថានភាពនៅសមុទ្រចិនខាងកើត និងសមុទ្រចិនខាងត្បូង ក្នុងនោះក៏បានសម្តែង ការគាំទ្រដល់កោះតៃវ៉ាន់ ដើម្បីចូលរួមក្នុងសន្និបាត សុខភាពពិភពលោកផងដែរ។
ជាការឆ្លើយតបអ្នកនាំពាក្យ ក្រសួងការបរទេសលោក Wang Wenbin បានឲ្យដឹងនៅក្នុងសន្និសីទ សារព័ត៌មានសង្ខេបប្រចាំថ្ងៃថា កិច្ចប្រជុំ G7 បានធ្វើការចោទប្រកាន់ដោយ គ្មានមូលដ្ឋានប្រឆាំងនឹងប្រទេសចិន។ លោកបានលើកឡើងថា ពួកគេបានជ្រៀតជ្រែកដោយចំហ នៅក្នុងកិច្ចការផ្ទៃក្នុងរបស់ប្រទេសចិន និងបានបង្កើតប្លុកនយោបាយ ដែលបានបង្វែរទិសដៅនៃប្រវត្តិសាស្ត្រ។
លោកបានបន្ថែមទៀតថា “នេះគឺជាការជ្រៀតជ្រែកទាំងស្រុង នៅក្នុងអធិបតេយ្យភាពជាតិរបស់ចិន និងការបំផ្លិចបំផ្លាញនូវបទដ្ឋាន គ្រប់គ្រងទំនាក់ទំនងអន្តរជាតិ ដែលប្រឆាំងនឹងនិន្នាការសន្តិភាពការអភិវឌ្ឍ និងកិច្ចសហប្រតិបត្តិការ សម្រាប់លទ្ធផលឈ្នះឈ្នះ” ។
លោកបានកត់សម្គាល់ថា បញ្ហាដែលទាក់ទងនឹងស៊ីនជាំង ទីបេ និងហុងកុង គឺជាកិច្ចការផ្ទៃក្នុងរបស់ប្រទេសចិន។ លោកបានបន្ថែមទៀតថាប្រទេសចិន ទទួលបាននូវមូលដ្ឋានពិត និងច្បាប់គ្រប់គ្រាន់សម្រាប់អធិបតេយ្យភាព និងសិទ្ធិដែលបានទាមទារនៅក្នុងកោះតាវយូ និងកោះជាប់គ្នាកោះសមុទ្រចិនខាងត្បូង និងដែនទឹកនៅជាប់គ្នាផ្សេងទៀត ៕
ដោយ ឈូក បូរ៉ា
