បរទេស៖ ប្រធានាធិបតីរុស្ស៊ី លោក វ្លាឌីមៀរ ពូទីន នាពេលថ្មីៗនេះ បានចោទប្រកាន់អ៊ុយក្រែន ជាប្រទេសជិតខាងខ្លួន ពីបទធ្វើការប្រឆាំងរុស្ស៊ី និងបានព្រមានថា ទីក្រុងមូស្គូនឹងត្រៀមខ្លួន ដើម្បីធ្វើប្រតិកម្មចំពោះអ្វីដែលលោកនិយាយថា ជាការគម្រាមកំហែង ចំពោះសន្តិសុខរុស្ស៊ីផ្ទាល់ ស្របពេលដែលមានតានតឹង កំពុងតែកើនកម្តៅខ្លាំងឡើង ជាមួយទីក្រុងកៀវ។
ការថ្លែងបែបនេះនៅថ្ងៃសុក្ររបស់លោក ពូទីន គឺត្រូវបានធ្វើឡើងក្រោយមួយថ្ងៃ បន្ទាប់ពីតុលាការអ៊ុយក្រែន បានសម្រេចឃុំខ្លួនលោក Viktor Medvedchuk នៅក្នុងផ្ទះ ដែលលោកជាអ្នកនយោបាយ គាំទ្ររុស្ស៊ីដ៏លេចធ្លោរ និងជាបុគ្គលស្និទ្ធិស្នាល នឹងលោកប្រធានាធិបតីរុស្ស៊ី។
លោក Viktor Medvedchuk ដែលជាអ្នកលើកកម្ពស់ឲ្យមាន ចំណងមិត្តភាពជិតស្និទ្ធជាមួយរុស្សី និងធ្វើតួនាទីជាអន្តរការីមួយរូប រវាងទីក្រុងមូស្គូនិងទីក្រុងកៀវ ក្នុងកាលជាអតីតនោះ កំពុងតែត្រូវបានស៊ើបអង្កេត ជុំវិញបទចោទប្រកាន់ថាក្បត់ជាតិ តែលោកបានបដិសេធថា នោះជាហេតុផលនយោបាយ។ លោកនឹងត្រូវបានប្រឈមមុខ ជាប់ពន្ធនាគាររហូតដល់ទៅ១៥ឆ្នាំ ប្រសិនបើមានទោសមែននោះ។
តាមសេចក្តីរាយការណ៍មួយ ដែលចេញផ្សាយដោយទីភ្នាក់ងារសារព័ត៌មាន Aljazeera បានឲ្យដឹងថា ថ្លែងនៅក្នុងកិច្ចប្រជុំមួយរបស់ ក្រុមប្រឹក្សាសន្តិសុខរុស្ស៊ី លោកប្រធនាធិបតី ពូទីន បានធ្វើការចោទប្រកាន់ទីក្រុងកៀវ ពីបទប្រព្រឹត្តធ្វើការបោសសម្អាត ផ្នែកនយោបាយក្នុងប្រទេស ៕
ប្រែសម្រួល៖ ប៉ាង កុង
