តូក្យូ៖មូលនិធិ Vision Fund របស់ SoftBank Group Corp បានបណ្តាក់ទុន នៅក្នុងក្រុមហ៊ុន ជីវបច្ចេកវិទ្យា ប្រទេសជប៉ុន ជាលើកដំបូង កាលពីថ្ងៃសុក្រ ដែលជាការកត់សម្គាល់ ការវិនិយោគដំបូងរបស់ខ្លួន សម្រាប់ក្រុមហ៊ុនក្នុងស្រុក ។ នេះបើយោងតាមការចេញផ្សាយ ពីគេហទំព័រឆៃណាឌៀលី។
ក្រុមហ៊ុន Aculys Pharma Inc ដែលមានមូលដ្ឋាននៅទីក្រុង Fujisawa ក្នុងខេត្ត Kanagawa បាននិយាយថា ខ្លួនបានរៃអង្គាសប្រាក់សរុបចំនួន ៦,៨ពាន់លានយ៉េន (៦០ លានដុល្លារ) ពីអ្នកវិនិយោគបច្ចេកវិទ្យា Sumitomo Mitsui Trust Investment Co និងក្រុមហ៊ុនផ្សេងៗទៀត។SoftBank Group បានវិនិយោគជាង១០០ពាន់លានដុល្លារក្នុងការចាប់ផ្តើមអាជីវកម្មនៅអឺរ៉ុប សហរដ្ឋអាមេរិក និងប្រទេសចិនដោយប្រើប្រាស់ បច្ចេកវិទ្យាទំនើប ដើម្បីបង្កើតសេវាកម្ម ប្រកបដោយភាពច្នៃប្រឌិត។
ការវិនិយោគចុងក្រោយបំផុតត្រូវបានគេរំពឹងថានឹងក្លាយជាចំណុចរបត់មួយសម្រាប់ការរីកចម្រើននៃបណ្តាក់ទុនបច្ចេកវិទ្យាក្នុងស្រុក។ ការវិនិយោគនៅក្នុង Aculys Pharma នឹងត្រូវប្រើប្រាស់សម្រាប់ការអភិវឌ្ឍន៍ផ្នែកព្យាបាល និងការធ្វើពាណិជ្ជកម្មនៃឱសថសម្រាប់ព្យាបាលជំងឺនៃការគេង ត្រូវបានអនុម័តដោយអាជ្ញាធរសហរដ្ឋអាមេរិក និងអឺរ៉ុប ហើយទីបំផុតនាំវាទៅកាន់ទីផ្សារប្រទេសជប៉ុន។
ក្រុមហ៊ុនបណ្តាក់ទុនជីវបច្ចេកវិទ្យានេះត្រូវបានបង្កើតឡើងកាលខែមករាដោយមានលោក Kazunari Tsunaba អតីតប្រធានក្រុមហ៊ុនឱសថជប៉ុន Novartis AG មានមូលដ្ឋាននៅប្រទេសស្វីសធ្វើជាប្រធាន។ Tsunaba បាននិយាយនៅក្នុងសេចក្តីថ្លែងការណ៍មួយថា យើងស្វាគមន៍ចំពោះការគាំទ្រពីក្រុមវិនិយោគិនដែលមានគុណភាពខ្ពស់ទូទាំងពិភពលោករបស់យើង ដើម្បីជំរុញកម្មវិធីនេះ ។ យើងនឹងប្រឹងប្រែង ឲ្យអស់ពីសមត្ថភាព ដើម្បីជួយអ្នកជំងឺឲ្យបានច្រើន តាមដែលអាចធ្វើទៅបាន ដើម្បីបង្កើនគុណភាពជីវិតរបស់ពួកគេ។
ការវិនិយោគនេះត្រូវបានធ្វើឡើងតាមរយៈ SoftBank Vision Fund 2 បានបង្កើតឡើងក្នុងឆ្នាំ ២០១៩ ជាមួយនឹង ១០៨ ពាន់លានដុល្លារ ដើម្បីវិនិយោគនៅក្នុងក្រុមហ៊ុនកំពុងរីកចម្រើនដែលផ្តោតលើបច្ចេកវិទ្យាមានមូលដ្ឋានលើបញ្ញាសិប្បនិម្មិត ក្នុងការតាមដានមូលនិធិជិត១០០ ពាន់លានដុល្លារបានបង្កើតឡើងក្នុងឆ្នាំ២០១៧ ៕
ដោយ៖លី ភីលីព
