អាមេរិក៖ព្រឹទ្ធសភាអាមេរិកបានបោះឆ្នោតជាឯកច្ឆ័ន្ទលើការរឹតបន្តឹងថ្មីដោយការដាក់កម្រិតឧបករណ៍ពីក្រុមហ៊ុនបច្ចេកវិទ្យាចិនដែលត្រូវបានដំឡើងនៅក្នុងបណ្តាញទូរគមនាគមន៍អាមេរិកបើយោងតាមការចេញផ្សាយពីគេហទំព័រស្គាយញ៉ូវ។
ច្បាប់ឧបករណ៍សុវត្ថិភាពនឹងហាមឃាត់គណៈកម្មការទំនាក់ទំនងសហព័ន្ធ (FCC) ពីការពិនិត្យមើល ឬចេញអាជ្ញាប័ណ្ណដល់ក្រុមហ៊ុន ដែលបានចុះបញ្ជីជាក់លាក់ រួមទាំងក្រុមហ៊ុន Huawei និង ZTE ផងដែរ។ ឥឡូវនេះ វានឹងត្រូវបញ្ជូនទៅប្រធានាធិបតី Joe Biden សម្រាប់ហត្ថលេខារបស់លោក នៅពេលរដ្ឋបាលរបស់លោកមានជម្លោះ ជាមួយប្រទេសចិន លើប្រធានបទជាច្រើន ចាប់ពីពាណិជ្ជកម្មរហូតដល់សិទ្ធិមនុស្ស និងឯករាជ្យភាពរបស់តៃវ៉ាន់។
កាលពីឆ្នាំមុន FCC បានកំណត់ជាផ្លូវការថា Huawei និង ZTE ជាការគំរាមកំហែងដល់សន្តិសុខជាតិ ដោយរារាំងក្រុមហ៊ុនអាមេរិកពីការចំណាយឧបត្ថម្ភធនរបស់សហព័ន្ធលើឧបករណ៍របស់ពួកគេ ចំណែកច្បាប់ថ្មីនឹងពង្រីកការហាមប្រាមដល់ក្រុមហ៊ុនប្រើប្រាស់មូលនិធិឯកជន។
នៅពេលនោះប្រធាននិយតករ Ajit Pai បានសង្កត់ធ្ងន់ថា ក្រុមហ៊ុនទាំង២ស្ថិតនៅក្រោមច្បាប់ស៊ើបការណ៍សម្ងាត់ជាតិរបស់ប្រទេសចិនឆ្នាំ២០១៧ អាចបង្ខំឲ្យពួកគេសហការជាមួយសេវាស៊ើបការណ៍សម្ងាត់របស់ប្រទេស។
លោក Pai បានបន្ថែមថា យើងមិនអាច និងមិនអនុញ្ញាតឲ្យបក្សកុម្មុយនិស្តចិនកេងប្រវ័ញ្ចលើភាពងាយរងគ្រោះនៃបណ្តាញ និងសម្របសម្រួលហេដ្ឋារចនាសម្ព័ន្ធទំនាក់ទំនងសំខាន់ៗរបស់យើងទេ៕
ដោយ៖លី ភីលីព
