បរទេស៖ កាលពីសប្តាហ៍មុន IRIAF បានធ្វើសមយុទ្ធតាមអាកាស ប្រចាំឆ្នាំរបស់ខ្លួន Fada’eeyan-e Harim-e Velayat ឬ “អ្នកការពារដែនជម្រករដ្ឋ” នៅទូទាំងប្រទេស។ សមយុទ្ធនេះពាក់ព័ន្ធ នឹងសមយុទ្ធបាញ់គ្រាប់ពិត និងយន្តហោះ មកពីមូលដ្ឋានទ័ពអាកាសចំនួន ៥ផ្សេងគ្នា ដែលបានហាត់សម អំពីស្ថានភាពផ្សេងៗគ្នា។
យោងតាមសារព័ត៌មាន Sputnik ចេញផ្សាយនៅថ្ងៃទី៣០ ខែតុលា ឆ្នាំ២០២១ បានឱ្យដឹងថា វាមិនច្បាស់ទេថា តើវីដេអូដែលបានចាប់ផ្តើមផ្សព្វផ្សាយ នៅលើប្រព័ន្ធផ្សព្វផ្សាយសង្គម នៅពេលដូចគ្នានេះ មកពីការហ្វឹកហាត់ កាលពីសប្តាហ៍មុន ឬលំហាត់មួយផ្សេងទៀតនោះទេ។ ទោះជាយ៉ាងណាក៏ដោយ សមយុទ្ធស្រដៀងគ្នានេះ ពិតជាត្រូវបានប្រារព្ធធ្វើឡើង នៅពេលដែល IRIAF អនុវត្តការការពារការវាយប្រហារ ដូចជាការគំរាមកំហែង ដោយអ៊ីស្រាអែលនាពេលថ្មីៗនេះ ដែលកាលពីសប្តាហ៍មុន បានត្រៀមប្រាក់ចំនួន 1.5 ពាន់លានដុល្លារសម្រាប់ការរៀបចំ ការវាយប្រហារប្រឆាំង នឹងរោងចក្រនុយក្លេអ៊ែរ របស់ប្រទេសអ៊ីរ៉ង់។
វីដេអូមួយដែលបានផ្សព្វផ្សាយបង្ហាញ ពីការចូលរួមក្នុងរយៈកម្ពស់ទាប គួរឱ្យភ្ញាក់ផ្អើលដោយយន្តហោះចម្បាំងអ៊ីរ៉ង់ ពីរគ្រឿង។ នៅក្នុងវីដេអូនោះ យន្តហោះចម្បាំង IRIAF F-5 Tiger II ផលិតដោយសហរដ្ឋអាមេរិក និងលក់ទៅឱ្យប្រទេសអ៊ីរ៉ង់ មុនពេលបដិវត្តន៍អ៊ីស្លាមឆ្នាំ 1979 បាញ់ចេញពីគោលដៅ ពីលើអាកាស។ យន្តហោះចម្បាំង MiG ហោះយ៉ាងលឿនទៅគោលដៅ ហើយបាញ់កាំជ្រួច Vympel R-73 ដែលស្វែងរកកំដៅពីអាកាស ទៅអាកាស ដែលរុញទៅមុខ ដើម្បីស្ទាក់ចាប់គោលដៅ នៅប៉ុន្មានវិនាទីក្រោយមក៕ ប្រែសម្រួលៈ ណៃ តុលា
