អាមេរិក៖បើយោងតាមទិន្នន័យស្ទង់មតិបានចេញផ្សាយថ្មីថា ពាក់កណ្តាលនៃមនុស្សពេញវ័យអាមេរិកដែលមិនចង់ទទួលការចាក់ថ្នាំបង្ការប្រឆាំងនឹង COVID-19 នៅនិទាឃរដូវ ឆ្នាំ២០២១ បាននិយាយថា គ្មានអ្វីអាចផ្លាស់ប្តូរចិត្តរបស់ពួកគេបានទេ នេះបើយោងតាមការចេញផ្សាយពីគេហទំព័រឌៀលីម៉ែល។
អ្នកស្រាវជ្រាវនៅទីក្រុងបូស្តុន ញូវយ៉ក និងបាសេឡូណាបានស្ទង់មតិមនុស្សពេញវ័យប្រហែល 6,000 រួមទាំងអ្នកចូលរួមមកពីទូទាំងប្រទេសប្រហែល២១ ភាគរយនៃពួកគេបាននិយាយថា ពួកគេមិនចង់ទទួលវ៉ាក់សាំង COVID-19 ឡើយ។ ជាងពាក់កណ្តាលនៃអ្នកឆ្លើយសំណួរទាំងនោះបាននិយាយថា គ្មានអ្វីនឹងផ្លាស់ប្តូរគំនិតរបស់ខ្ញុំទេ អំពីវ៉ាក់សាំងនេះ ខណៈ១៣ភាគរយបាននិយាយថា ដំបូន្មានពីសមាជិកគ្រួសារ ឬមិត្តជិតស្និទ្ធអាចជួយបញ្ចុះបញ្ចូលពួកគេ។
ចំណែក៩ ភាគរយបាននិយាយថា ការណែនាំពីគ្រូពេទ្យគ្រួសារនឹងមានប្រយោជន៍។ ទិន្នន័យស្ទង់មតិបានបង្ហាញថា អ្នកអភិរក្ស អ្នករស់នៅក្នុងភាពក្រីក្រ និងអ្នកដែលធ្វើការនៅខាងក្រៅផ្ទះ ទំនងជាប្រឆាំងនឹងការចាក់វ៉ាក់សាំង។
ការស្ទង់មតិនេះត្រូវបានធ្វើឡើងនៅខែមេសា ឆ្នាំ២០២១ មុនពេលការកើនឡើងនៃវ៉ារ្យ៉ង់ Delta នៅសហរដ្ឋអាមេរិក កម្មវិធីលើកទឹកចិត្តវ៉ាក់សាំង អាណត្តិ និងគំនិតផ្តួចផ្តើមផ្សេងៗទៀត ទោះយ៉ាងណាក៏ដោយ ប្រហែល២០ ភាគរយនៃមនុស្សពេញវ័យនៅសហរដ្ឋអាមេរិកនៅតែមិនបានចាក់វ៉ាក់សាំង៕ដោយ៖លី ភីលីព
