អាមេរិក៖យោងតាមការចេញផ្សាយពីគេហទំព័រស្គាយញ៉ូវបានប្រាប់ឲ្យដឹងថា សហរដ្ឋអាមេរិកបានចោទប្រកាន់ជនជាតិអ៊ីរ៉ង់២នាក់លើការជាប់ពាក់ព័ន្ធរបស់ពួកគេនៅក្នុងយុទ្ធនាការមួយដើម្បីបំភិតបំភ័យ និងមានឥទ្ធិពលលើអ្នកបោះឆ្នោតអាមេរិកសម្រាប់ការជ្រើសរើសប្រធានាធិបតីឆ្នាំ ២០២០។
យោងតាមឯកសាររបស់តុលាការបានឲ្យដឹងថា បុរស និងសហការីរបស់ពួកគេបានធ្វើយុទ្ធនាការសម្របសម្រួលតាមគោលដៅដើម្បីបំបាត់ទំនុកចិត្តលើសុចរិតភាពនៃប្រព័ន្ធបោះឆ្នោតរបស់សហរដ្ឋអាមេរិក និងសាបព្រួសការមិនចុះសម្រុងគ្នា។ នេះរាប់បញ្ចូលទាំងការលួចចូលគេហទំព័រចុះឈ្មោះអ្នកបោះឆ្នោតរបស់រដ្ឋ ក៏ដូចជាការក្លែងខ្លួនជាសមាជិកនៃក្រុម Proud Boys ដោយប្រកាន់ស្តាំនិយមក្នុងអ៊ីម៉ែលទៅកាន់អ្នកបោះឆ្នោតប្រជាធិបតេយ្យដែលគំរាមកំហែងរបួសរាងកាយ ប្រសិនបើពួកគេមិនផ្លាស់ប្តូរសម្ព័ន្ធភាពគណបក្សរបស់ពួកគេ និងបោះឆ្នោតឲ្យប្រធានាធិបតីលោក Trump” ។
បុរសនោះមានឈ្មោះ Seyyed Kazemi អាយុ ២៤ ឆ្នាំ និងលោក Sajjad Kashian អាយុ ២៧ ឆ្នាំត្រូវបានពិពណ៌នាថា ជាអ្នកលួចកុំព្យូទ័រដែលមានបទពិសោធន៍ធ្វើការជាអ្នកម៉ៅការឲ្យក្រុមហ៊ុនអ៊ីរ៉ង់ផ្តល់សេវាកម្មដល់រដ្ឋាភិបាលអ៊ីរ៉ង់។យោងតាម FBIបាននិយាយថា ទន្ទឹមនឹងការលួចព័ត៌មានអ្នកបោះឆ្នោត ពួកគេបានអះអាងមិនពិតថា គណបក្សប្រជាធិបតេយ្យគ្រោងនឹងកេងប្រវ័ញ្ច “ភាពងាយរងគ្រោះផ្នែកសុវត្ថិភាព” នៅលើគេហទំព័រចុះឈ្មោះអ្នកបោះឆ្នោតរបស់រដ្ឋ ក្នុងការកែសម្រួលសន្លឹកឆ្នោតតាមសំបុត្រ ឬសូម្បីតែចុះឈ្មោះអ្នកបោះឆ្នោតដែលមិនមាន។
FBIបានបន្តថា ការអះអាងទាំងនេះត្រូវបានផ្ញើតាមអ៊ីម៉ែល និងសារ Facebook ទៅកាន់សមាជិកព្រឹទ្ធសភាសាធារណរដ្ឋ សមាជិកសភាសាធារណៈរដ្ឋ បុគ្គលដែលមានទំនាក់ទំនងជាមួយយុទ្ធនាការប្រធានាធិបតី Donald Trump ទីប្រឹក្សាសេតវិមាន និងសមាជិកនៃប្រព័ន្ធផ្សព្វផ្សាយ៕ ដោយ៖លី ភីលីព
