វ៉ាស៊ីនតោន ៖ មន្ទីរបញ្ចកោណកាលពីថ្ងៃចន្ទបានគូស បញ្ជាក់ពីតម្រូវការ ក្នុងការធ្វើការជាមួយសម្ព័ន្ធមិត្ត និងដៃគូ ដើម្បីពង្រឹងការទប់ស្កាត់ប្រឆាំង នឹងការឈ្លានពាន របស់ចិន និង ការគំរាមកំហែង របស់កូរ៉េខាងជើង បន្ទាប់ពីការត្រួតពិនិត្យ រយៈពេលជាច្រើនខែ នៃឥរិយាបថយោធាពិភពលោក របស់សហរដ្ឋអាមេរិក។
មន្ត្រីក្រសួងការពារជាតិ ជាន់ខ្ពស់មួយរូបបានលើកឡើងថា “តំបន់អាទិភាព” នៅក្នុង Global Posture Review គឺជាតំបន់ឥណ្ឌូប៉ាស៊ីហ្វិក ចំពេលមានការអះអាងកាន់តែខ្លាំងឡើង របស់ប្រទេសចិននៅទីនោះ ។
ប៉ុន្តែ លោកស្រីបាន លើកឡើងថា មិន មាន អ្វី ត្រូវប្រកាស នៅក្នុងការពិនិត្យ ទាក់ទងនឹងតៃវ៉ាន់នោះទេ ។ កោះដែលគ្រប់គ្រង ដោយខ្លួនឯងកំពុង ប្រឈម មុខ នឹងសម្ពាធយោធាកាន់តែខ្លាំងឡើងពីប្រទេសចិន ដែលចាត់ទុកវាថាជាខេត្ត ដែលត្រូវបង្រួបបង្រួម ជាមួយដីគោកឡើងវិញ ដោយកម្លាំងប្រសិនបើចាំបាច់ ។
មន្ទីរបញ្ចកោណបានឲ្យដឹង នៅក្នុងសេចក្តីប្រកាសព័ត៌មានមួយថា ការពិនិត្យឡើងវិញនេះ “ដឹកនាំកិច្ចសហប្រតិបត្តិការ បន្ថែមជាមួយសម្ព័ន្ធមិត្ត និងដៃគូនៅទូទាំងតំបន់ ដើម្បីជំរុញ គំនិតផ្តួចផ្តើម ដែលរួមចំណែកដល់ស្ថិរភាព ក្នុងតំបន់ និងរារាំងការឈ្លានពាន ផ្នែកយោធា ដែលមានសក្តានុពលពីប្រទេសចិន និង ការគំរាមកំហែងពីកូរ៉េខាងជើង” ។
ការត្រួតពិនិត្យឥរិយាបថសកលលើកដំបូង ក្រោមការគ្រប់គ្រង របស់ប្រធានាធិបតីអាមេរិកលោក ចូ បៃដិន មិនបាននាំឱ្យមានការផ្លាស់ប្តូរធំដុំណាមួយ នៅក្នុងការបែងចែកកងទ័ពអាមេរិកនៅជុំវិញពិភពលោកនោះទេ ។
ខណៈពេលដែលព័ត៌មានលម្អិតភាគច្រើន នៅតែមិនច្បាស់លាស់ មន្ត្រីជាន់ខ្ពស់បានប្រាប់សន្និសីទសារព័ត៌មានថា អូស្ត្រាលី នឹងឃើញការ ដាក់ពង្រាយយន្តហោះចម្បាំងប្ដូរវេន និងយន្តហោះទម្លាក់គ្រាប់បែក ការហ្វឹកហ្វឺនកងកម្លាំងជើងគោក និងបង្កើនកិច្ចសហប្រតិបត្តិការដឹកជញ្ជូន។
លោកស្រីក៏បានឲ្យដឹងផងដែរថា “ការកែលម្អហេដ្ឋារចនាសម្ព័ន្ធជាច្រើន” ត្រូវបានរំពឹងទុកនៅក្នុងកោះ Guam និងអូស្ត្រាលី ក្នុងប៉ុន្មានឆ្នាំខាងមុខនេះ រួមទាំងកន្លែងដឹកជញ្ជូន កន្លែងស្តុកទុកប្រេងឥន្ធនៈ និងគ្រាប់បែក និងការធ្វើឱ្យប្រសើរឡើង នូវអាកាសយានដ្ឋាន ៕
ដោយ ឈូក បូរ៉ា
