បរទេស ៖ កងទ័ពរបស់ប្រទេសអ៊ុយក្រែន តាមសេចក្តីរាយការណ៍ នៅថ្ងៃសុក្រម្សិលមិញនេះ បានប្រារព្ធធ្វើការហ្វឹកហាត់ បាញ់ប្រព័ន្ធបាញ់រថក្រោះ ដែលអង់គ្លេស បញ្ជូនឲ្យ ជាផ្នែកនៃកិច្ចប្រឹងប្រែង របស់លោកខាងលិច ដើម្បីជួយអ៊ុយក្រែន ការពារខ្លួនឯង ពីការឈ្លានពានណា មួយរបស់រុស្ស៊ី ។
ប្រទេសរុស្ស៊ី នាពេលថ្មីៗនេះ បានបង្ខំលោកខាងលិចឲ្យចូលពិភាក្សាស្តីពីការទាមទារ របស់ទីក្រុងមូស្គូ ឲ្យមានការធានាសន្តិសុខថ្មីក្នុងតំបន់អឺរ៉ុប តាមរយៈការប្រមូលផ្តុំ កងទ័ពជើង១០០.០០០សែននាក់ នៅជិតព្រំដែនរបស់ខ្លួន ជាប់នឹងប្រទេសអ៊ុយក្រែន ដែលជាអតីតសមាជិក សហភាពសូវៀត ចង់ចូលរួមជាមួយអង្គការ សម្ពន្ធមិត្តយោធាណាតូ ។
នៅក្នុងអំឡុង ពេលធ្វើការហ្វឹកហាត់ នៅទីតាំងហ្វឹកហាត់យោធា ក្នុងប្រទេសអ៊ុយក្រែន ភាគខាងលិចនោះ ទាហានអ៊ុយក្រែន លោក Zinovy Luzhansky បាននិយាយដូច្នេះថា “វាគ្រប់គ្រានដើម្បីបាញ់តែមួយគ្រាប់ កម្ទេចយានសត្រូវបានទាំងស្រុង” ។
យោងតាមសេចក្តីរាយការណ៍មួយ ដែលចេញផ្សាយដោយទីភ្នាក់ងារ សារព័ត៌មាន Yahoo News នៅថ្ងៃទី២៩ ខែមករា ឆ្នាំ២០២២ បានឲ្យដឹងថា ទាហានរូបនោះបានបន្តទៀតថា “វានឹងកាន់តែងាយស្រួលខ្លាំងឡើង ដើម្បីប្រយុទ្ធប្រឆាំង សហព័ន្ធរុស្ស៊ី ព្រោះតែអាវុធនេះ អាចកម្ទេចបានយ៉ាងងាយ នូវឧបករណ៍យោធាពាស ដែកសត្រូវគ្រប់ប្រភេទ” ៕ ប្រែសម្រួល៖ប៉ាង កុង
