កូរ៉េ៖ បើយោងតាមចេញផ្សាយផ្លូវការ របស់គេហទំព័រកម្សាន្តកូរ៉េខាងត្បូង Allkpop បានប្រាប់ឲ្យដឹងថា តន្ត្រីករជនជាតិអ៊ុយក្រែន៣នាក់ ដែលជាសមាជិកសកម្មនៃវង់តន្រ្តីឯកជនមួយ ក្នុងប្រទេសកូរ៉េ បានយកកាំភ្លើងជំនួសឲ្យឧបករណ៍តន្រ្តីរបស់ពួកគេ ដើម្បីការពារប្រទេស ពីការឈ្លានពានរបស់រុស្ស៊ី។
យោងតាមក្រុមតន្រ្តី Seoul Pops Orchestra បានបញ្ជាក់ថា សមាជិកជនជាតិអ៊ុយក្រែន ៣ នាក់ថ្មីៗនេះបានត្រឡប់ទៅអ៊ុយក្រែនវិញ សម្រាប់ការចុះឈ្មោះស្ម័គ្រចិត្ត។ Seoul Pops Orchestra គឺជាវង់តន្រ្តីឯកជនមួយ ត្រូវបានបង្កើតឡើងក្នុងឆ្នាំ ១៩៨៨ និងមានសមាជិកចំនួន ៧២ នាក់។ ឧបករណ៍តន្រី្តវីយូឡុងធំ Zucchini Dmitro អាយុ ៤៧ ឆ្នាំ បានចូលរួមនៅឆ្នាំ ២00២ អ្នកលេងវីយូឡុង Leu Keller អាយុ ៥១ ឆ្នាំ បានចូលរួមក្នុងឆ្នាំ ២0១៥ និងអ្នកផ្លុំត្រែង Matvienko Konstantin អាយុ ៥២ ឆ្នាំ បានចូលរួមនៅឆ្នាំ ២0១៦ បានចាកចេញ ដើម្បីការពារប្រទេសរបស់ពួកគេ។
សមាជិកទាំង៣នាក់នោះ គឺជាតន្ត្រីករដ៏មានទេពកោសល្យទាំង៣នាក់ មកពីបណ្ឌិតសភាតន្ត្រីជាតិអ៊ុយក្រែន Tchaikovsky មានទីតាំងក្នុងទីក្រុង Kyiv។ Dmitro ជាអ្នកដំបូងគេក្នុងចំណោម អ្នកទាំង៣បានចូលរួមក្នុងក្រុម Seoul Orchestra បានបម្រើការជាសមាជិកសំខាន់នៃវង់តន្រ្តី។ លោកបានណែនាំឲ្យតន្ត្រីករ២នាក់ទៀត ទៅចូលរួមជាមួយលោកនៅប្រទេសកូរ៉េ ហើយបានធ្វើការជាមួយគ្នា តាំងពីពេលនោះមក ។
Seoul Pops Orchestra អ្នកដឹកនាំប្រតិបត្តិ Ha Seong Ho បាននិយាយថា ចាប់តាំងពីការប្រគុំតន្ត្រីឆ្នាំថ្មី ក្នុងខែមករាមក ខ្ញុំបានព្យាយាមស្តាប់ព័ត៌មាន អំពីសមាជិកជនជាតិអ៊ុយក្រែនរបស់យើង ចាប់តាំងពីខ្ញុំមិនអាចទាក់ទង ជាមួយពួកគេបាន។ នៅពេលខ្ញុំបានឃើញរូបថតរបស់ Dmitro ពាក់ឯកសណ្ឋានទាហាន និងកាន់កាំភ្លើង ខ្ញុំភ្ញាក់ផ្អើលណាស់។
លោកបានបន្តពន្យល់ថា ពួកគេគឺជាសមាជិកនៃវង់តន្រ្តី ដែលនៅជាមួយពួកយើងជាយូរមកហើយ ខ្ញុំបានយំយ៉ាងខ្លាំង នៅពេលខ្ញុំបានទទួលដំណឹងថា ពួកគេកំពុងចូលរួម និងប្រយុទ្ធនៅក្នុងសង្រ្គាម ខ្ញុំគ្រាន់តែចង់ឲ្យ សមាជិកអ៊ុយក្រែនរបស់យើងទាំងអស់ ត្រឡប់មកវិញដោយសុវត្ថិភាព៕ ដោយ៖លី ភីលីព
